Qırımnıñ yerli akimiyeti qırımtatar milliy Meclisini yoq etecek siyasetni alıp barmaqta.
Bu aqta İnsan aqları boyunca qırım eyyetiniñ neticeleri bildireler, mında qırımtatar milliy Meclisiniñ binadan quvulğanına ketirgen Qırım akimiyetiniñ areketleri belgilene.
Akimiyetniñ areketlerini talil etip, mütehassıslar mahkeme ve prokuratura Qırım prokuraturası ve «Qırım» Fondı» hayrriye teşkilâtı arasında davada teñ olmağan qararlarnı alğanı aqqında bildireler. Yani, «Qırım» Fondı» bank esaplarınıñ qapatıluvı ve Meclis ofisi bulunğan binadan quvulğanı nazarda tutıla. Şimdi «Qırım» Fondı» kendi mülkini qullanıp ve işine devam etip olamay. Mecliske de yardım etmege imkânı yoq.
«Böyle ise qırımtatar milliy Meclisiniñ ve «Qırım» Fondı hayriye teşkilâtınıñ ileri faaliyetine mania yapıldı. Bu kibi areketler birleşmelerniñ serbestligini boza»,– deyler uquq qorçalayıcılar.
Qırım.Aqiqat bergen malümatqa binaen, sentâbr 17-de Meclis binasında «Qırım» Fondu» Hayriye Teşkilâtınıñ reisi Riza Şevkiyevge mahkeme qararını seslendirdiler. Bundan soñ «Qırım» Fonduna» ait olğan binanı qapatmaq qararları aqqında bildirdiler. Bundan sebep Qırımtatar Milliy Meclisiniñ vekilleri binanı terk etmege mecbur ediler.
Sentâbr 19-da Qırımtatar Milliy Meclisiniñ temsilcileri binanı terk etip, onı müürlemege mecbur oldılar.
Mahkeme nezaretçileri Meclis, «Qırım» Fondu», «Avdet» gazetası, «Yıldız» mecmuası yerleşken Şmidta, 2 adresi boyunca binanı tevqif ettiler. Bundan ğayrı, közeticileriniñ vesiqalarında Meclis ofisleri, em de «Qırım» Fonduna» ait olğan biger obyektler yerleşken Jidkova, 40 adresi boyunca bina da qayd etile.
Aqmescitniñ Merkeziy rayon mahkemesi «Qırım» Fondu» Hayriye Teşkilâtınıñ mal-mülki ve bank esaplarınıñ tevqifini öyle de qaldırdı. Bundan ğayrı, prokuraturanıñ qırımtatar halqınıñ lideri Mustafa Cemilevni fondnıñ tesisçileri erkânından çıqarmaq talabını yerine ketirdi.
