Qırımtatar milliy areketiniñ iştirakçisi, Qırımtatar Milliy Qurultayınıñ Merkeziy saylav komissiya reisi Zair Smedlâyev ealini cedvelge aluv tedbirlerinden vazgeçti, çünki onı qırımtatarca keçirmeyler. Bu aqqında Zair Smedlâyev Qırım.Aqiqat mühbirine bildirdi.
«İnsan aqqları boyunca Şura toplaşuvında Putin Qırımda ealini cedvelge aluv tedbirleri qırımtatar tilinde keçirilecegini aytqan edi. Lâkin körgenimiz kibi, bu boş laf. Anketa yalıñı rusça tizildi», – dedi o.
O, qırımlılar aqqında malümat toplağan insanlarnıñ etnik mensüpligini de qayd etti: «Ealini cedvelge alğan insanlar da rus. Qırımtatarlarğa işanç yoqmı? Qırımtatarlar toplu yaşağan yerlerde bunı qırımtatarlar da yapar ediler».
Smedlâyevniñ aytqanına köre, Qırımnıñ daa bir sakini işbu tedbirler ukrainca keçirilmegeni içün olardan vazgeçti.
Tanılmağan Qırım cumhuriyetinde yañı «akimiyet» üç tilni – rus, ukrain ve qırımtatar – devlet tilleri olaraq ilân etti. Oktâbr 14-25 künleri Rusiye işğal etilgen Qırımda ealini cedvelge ala.
2014 senesi mart 16-da Qırım ve Aqyar şeerinde yarımada statusı aqqında «referendum» olıp keçti. Onıñ neticesinde Rusiye Qırımnı öz terkibine qabul etti. Ne Ukraina, ne Avropa Birligi, ne de Amerika Qoşma Ştatları işbu rey berüvni tanımadılar.
