İşgal etilgen Qırım akimiyeti noyabr ayına qadar topraq inventarizatsiyasını bitirip, yardımğa muhtac olğan insanlarğa damartılarnı ayırmağa başlaycaq eken. Bu aqqında cumhuriyetniñ mal-mülk ve topraq munasebetleri «naziri» Aleksandr Gördetskiy bildirdi, – dep haber ete TASS.
Onıñ aytqanına köre, Qırımda evelden nevbet alğan insanlar topraq damartılarınıñ saipleri olacaqdar. «Nazir» şunı da qayd etti ki, Ukraina qanunları boyunca yardımğa muhtac olğanlar topraq damartısını bedava ala ediler, Rusiye ise böyle bir şey yoq.
Qırımnıñ «Devlet şurası» «Devlet ya da belediye mal-mülkinde olğan topraq damartılarını berüv aqqında» qanun leyhasını baqmaqta. Oña köre, imtiyazları olğan insanlar topraq alacaqlar.
2014 senesi mart 16-da Qırım ve Aqyar şeerinde yarımada statusı aqqında «referendum» olıp keçti. Onıñ neticesinde Rusiye Qırımnı öz terkibine qabul etti. Ne Ukraina, ne Avropa Birligi, ne de Amerika Qoşma Ştatları işbu rey berüvni tanımadılar.
