Link açıqlığı

Ürmetli rusiyeliler! Keçenlerde, menden Qırımda nefaqa parası kerçekten de Ukrainadan daa yüksekmi, dep soradılar. Men de, yarımadaki nefaqalar tek Ukrainada olğanından degil, sizniñ rusiyeli nefaqalarıñızdan da, artqaç olğanını bilmegeniñizni tüşündim.

Eñ azı – 7 biñ ruble, büyük staj ve diger yararlıqlar olğanlarnıñ nefaqaları – qat-qat çoq. Devlet işinde çalışqanlar bu cümleden. Yahşı, degilmi? Er şey siznin esabıñızğa! Ya da siz, qırımlılar Rusiyeni bedava sevelermi, dep tüşüñesizmi? Kendi devletke hainlik yapacaq olsañ – çoqça qazanmaq kereksiñ! Ruslarnıñ aqaretlevi aqqında masallar ise, tek ahmaqlar, yani sizler içün aytıla. Mında «benderovetslerni» ömürinde iç bir kimse körmedi, ealiniñ 15%-nı teşkil etken qırımtatarlar isteseler bile, qalğanlarnı sıqıştırıp olamazlar.

Fiyatlar östi. Bazı nefaqacılarğa atta yüksek nefaqalar yetmey. İlâclarğa çoq masraf etedirler. Em de kommunal hızmetleri içün, sizniñ rusiyeli fiyatlarıñızğa köre, töleyler. Elbette, olar Rusiyede ölmege hayal ete ediler – amma, yaqın kelecekte degil! Söz kelimi, nefaqacılar Qırım ealisiniñ üçte bir qısımını teşkil eteler – 677 biñ etrafındanlar.

Siz quvana-quvana künde qazanğan paranı Qırımğa yollağanıñıznı aytasıñız! Amma, sizni kederletecek bir şeyni aytayımmı – bergeniñiz pek az! Şahsiy ticaret saası, yazlıq mevsimi qazançsız qalğanı sebebinden büyük zarar kördi. Nefaqacı ve devlet hadimlerini ise, kimlerdir baqmaq kerek te!

Qırım evelden de qoşma sermiyağa muhtac edi, şimdi ise daa beter oldı. Rusiye daima Ukrainağa yardım ete edi, şimdi de yardım qolunı uzattı – cenkleşken vaziyette bulunğan qomşusından boş-boğazlarnıñ teminlevini öz boynuna aldı. Bazı hıyanet «ukroplar» huntanıñ parasını iqtisad etmek içün, Rusiye Federatsiyasınıñ pasportları yoq demey, alalar.

Yazıq ki, amma, Kiyevde parlament saylavlarından soñ, akimiyet başına kene de «pravıy sektor» vekilleri kelmeleri mümkün, çünki qırımlı nefaqacılar sevimli kommunist ve tünevinki «regionallar» içün rey berip olamazlar.

DHC (DNR) ve LHC-nı (LNR) qoşmağa aqlıñızğa bile kelmesin. Bücetiñiz buña yetmez. Yer mayı da ucuzlaşa… Çünki, biz yañı rusiyeliler, bayağı paalığa tüşemiz!

Elzara Beşuyli, bloger, qırımlı

«Bloglar» rubrikasında bildirilgen tüşünceler müelliflerniñ noqtai nazarını bildirip, muarririyetnen aynı olmaması mümkün

XS
SM
MD
LG