Link açıqlığı

Qırımda qırımtatarlarnı qırsızlamağa devam eteler. Soñki aylar içinde Timur Şaymardanov, Seyran Zinedinov, İslâm Cepparov, Cevdet İslâmov, Eskender Apselâmov, bir kun evelsi Belâl Bilâlov, Artöm Dayrabekov ğayıp oldılar. Eñ kederlisi şu ki, bugünki künge qadar iç biri tapılmadı, tapılğan ekisi – Reşat Ametov (onıñ ceseti martnıñ 16-nda tapılğan edi) ve Edem Asanov (oktâbr 3 künü asılı tapıldı) endi ebediyen susıp qaldılar.

Reşat Ametovnı Aqmescitniñ merkeziy meydanından «imayeciler» maşinağa oturtıp alıp ketkenlerini köstergen video, «taqiqatçılarğa» yardım etmedi. 8 ay içinde taqiqat nasıl alıp barılğanı aqqında malümat bildirilmey, taqiqatçılarnıñ özü bir qaç kerek deñiştirildi. Ametovnıñ qatilleri tapılacağına, tapılsa da cezalanacağına ümütler sönüp qalayata.

Mesele şunda ki, Qırım «yolbaşçısı» Sergey Aksönov «Qırım baari» vaqialarnıñ iştirakçilerini afu etmek teklifinen çıqtı. Qayd etmek kerek ki, mart ayında «imаeciler» arasında esasen Aksönovnıñ tarafdarları bulunıp, ekseriyeti «Russkoye yedinstvo» firqasınıñ azalarıdır. Bu qanunsız birleşmeler tek adiy qırımlılarğa, mühbirlerge degil de, atta BMT vekillerine ücüm ete ediler. İç birisi mesülietlikke çekilmedi, aksine olarnıñ reberi Şeremet, Aksönov tarafından baş nazir muavini vazifesine tayinlendi (şimdi – birinci muavini oldı). Onıñ içün, kim-kimni ve ne içün afu etecegi aqqında sualniñ cevabı belli…

Çalınğan qırımtatarlardan, iç olmağanda, biri tiri tapılğan olsa edi, bir çoq suallerge cevaplar peyda olur edi, amma, iç biri şimdiki künge qadar sağ tapılmadı, ve tek qırımtatarlarnı qırsızlağanlarını köz ögüne alsaq, bu areketler bir merkezden idare etilgenini añlarmız. Yani, bu areketler tesadüfiy degil, olar qırımtatarlarğa qarşı yapıla.

Çaluvlarnıñ eki hususiyeti bar. Birinciden: qırımtatarlarnı çalalar. Ekinciden: bu adiseler işğalden soñ yüz berip başladı. Bu eki hususiyetni bir arağa ketirip, şunı ayta bilemiz, Qırımda işğalge qarşı açıqtan-açıq qırımtatarlar çıqtılar ve onı tanımadılar, işğal Rusiye tarafından yarımadadaki beşinci kolonna tarafından eda etildi.

Vladimir Putin: Cesaret etsinler, baqayıq…

Qırımtatarlar lideri Mustafa Cemilev matbuat vastalarında soñki bir qaç ay içinde yarımadada 18 qırımtatarı ğayıp oldı, dedi. Olardan iç biri tapılmadı. Politsiya, FSB, Prokuratura olarnı qıdırmayıp, qırımtatar mektep, ev, cami, universitetlerde, Mecliste tintüvlerni keçire. Bu tedbirler tek qırımtatar, musulman oquv yurtlarında, evlerde ötkerile. Neticede, islam boyunca kitaplardan başqa ciddiy şey tapılmadı, iç bir kimse mesülietlikke çekilmedi, amma tintüvler devam ete.

Mart ayında Moskvada bulunğan Mustafa Cemilev, Vladimir Putinnen telefon arqalı laf etkende, qırımlı «imayeciler», rusiyeli arbiyler taarfından qırımtatarlarğa qarşı qanunsız areketeler yapıla bilecegini ayttı. O vaqıt, Cemilev aytqanı kibi, Putin «cesaret etsinler, baqayıq», degen edi. «O, qırımtatarlarnıñ qasabaları yanında atta qaravullarnı qoymağa avale etkenini bildirdi», – dep ayttı Cemilev.

Bugünde bugün qırımtatarlarğa qarşı yapılğan areketlerniñ episi Mustafa Cemilev mart ayında tahmin etken şeyler, degilmi?

Rusiye yaqlı teşebbüsçiler bu şekilde qırımtatrlardan intiqam almağa istegenlerini tahmin etmek mümkün. Bu cinayetlerniñ müellifleri bir taraftan qırımtatarlarnı qorquzmaq, boysundurmaq, sustırmağa isteydiler, ekinciden ise, qırımtatarlar içün Qırımda dayanılmaz şaraitler yaratıp, olarnıñ başqa yerlerge köçip ketkenlerini isteyler. Bu niyetler yerine kelecekmi, ya yoq, belli degil.

İlgiz Şakirov, Qırım.Aqiqatnıñ siyasiy közeticisi

«Fikir» rubrikasında bildirilgen tüşünceler müelliflerniñ noqtai nazarını bildirip, muarririyetnen aynı olmaması mümkün

XS
SM
MD
LG