Varşavada oktâbr 11 künü ukrainliler ve qazan tatarlarğa destek numayışı keçirildi. Bunı Azatlıq Radiosı bildire.
Varşava sakinleri soqaqlarğa: «Tatar sakinlerine ve Nadejda Savçenkoğa nisbeten ayırım – Putinniñ tarafından Groznıy siyasetiniñ devam etilmesidir», «Qazanda işğalcilerge abide bar, Qazannıñ qoruycılarına – ne vaqıt?», «1552 senesi – Rusiye tarafından tatar halqınıñ qul etüv tarihıdır», «Ukrainliler ve tatarlar azatlıq oğrunda fikirdeşler», «Moskva, tatarlarğa qazan şapkeni – Qazanda İvan Groznıy tarafından qırsızlanğan Monomah şapkesini qaytar», ve diger plakatlar ile çıqtılar.
Numayışnıñ teşkilâtçısı qazan tatarı, bir qaç yıl devamında Ukrainada, şimdi ise Poloniyada yaşağan Rusiye siyasiy qaçağı Nafis Kaşapov oldı.
Onıñ sözlerine köre, numayışnıñ iştirakçileri Ukrainadaki vaziyetni 1552 senesi olğan qazan tatarlarınıñ genotsidi ile qıyasladılar.
«Qazan Hanlığı padişa İvan Groznıy tarafından devirildi. Qazannıñ zaptı vaqtında Rusiye ordusı qazan tatarlarnı öldürip, cesetleri Astrahan saillerine barması içün olarnı Edilge bıraqa ediler. Anda astrahan tatarları yaşaylar, olar – rusiyelilerniñ tüşüngeni kibi, bunı körip, Rusiye padişasına boysunmasalar, olarnen ne olacağını añlamaq kerek ediler», – dep tarif etti Nafis Kaşapov.
Varşava Avromaydan teşkiliy kömiyetetiniñ reisi Nataliya Pançenko aytqanı kibi, 1552 senesi vaqiaları ve Ukrainada olğanı ile arasında bağ açıq-aydındır.
«Bugün ukrainliler qazan tatarlarğa öz birdemligini numayış eteler, çünki rusiyeliler o vaqıt olarnen yapqanını bugün ukrainlilerge yapalar. Şunıñ içün olarnıñ azatlıq oğrundaki küreşini biz qol tutamız. Tatarlar – tili ve nice asırlıq medeniyeti olğan millettir, amma rusiyeli imperialistik siyaseti sebebinden olar 400 yıldan ziyade devletsiz yaşaylar», – dedi o.
Nafis Kaşapov aytqanı kibi, plakatlar ukrain, leh, tatar, ingliz ve rus tillerinde yazılğan edi.
Qazannıñ zapt etüvi künü – işbu faciada elâk olğan askerlerniñ hatırasına ötkerilgen adetiy tedbirdir. Adet üzre, Qazanda oktâbr 12-13 künleri qayd etile. İşbu tedbirde «1552 senesini hatırlayım» ve «1552 senesi – tatar halqınıñ holokostı» degen şiarlar qullanıla.
