ATR qırımtatar telekanalına qarşı basqı tezden onıñ qapatılmasınen yekünlene bile. Bu aqqında Qırım.Aqiqat saytında olğan telekanal beyanatınıñ metninde aytıla.
«ATR qırımtatar telekanalı iç bir vaqıt «teşviqat», «fikirlerni qıstırması», «milletlerara dava doğurması», «ekstremizm çağrısı» ve bizni diger sebepsiz qabaatlağan günâhlarnen oğraşmadı», – aytıla beyanatta.
Mında qayd etile ki, ATR formatı – medeniy-maarif ve informatsion yayınlar, maqsadı ise – qırımtatarlarnıñ tili ve medeniyetini inkişaf ettirmek, Qırımnıñ çoq medeniyetli cemaatında eyi qomşulıq printsiplerni şekillendirmek, seyircini yarımadada ve ondan tış olıp keçken adise-vaqialarnen tanış etmektir.
«Bu arada, telekanalnıñ aynı bu mevamı onıñ «cadı avı» obyekti olmasına sebep oldı, ve, ATR etrafında olğanlarğa köre, akimiyetniñ nevbetteki adımı onıñ qapatılması olması mümkün», – aytıla beyanatta.
Hatırlatamız, sentâbr 24-te telekanal reberligi Ekstremizmge qarşı areketler Merkezinden «milliy ve diniy mensüplik boyunca ola bilecek ayırımlar aqqında fikirni tarqata, cemaat arasında Rusiyege qarşı keyf olmasına sebep bere, qırımtatar cemaatçılığı içinde akimiyet ve onıñ areketlerine sayğısızlıqnı doğura, böyleliknen ekstremist faaliyetiniñ telükesi peyda ola» kibi mektüp aldı. Telekanal yolbaşçılığından vesiqalarnı ve kanalda işlegen bütün insanlarnıñ cedvelini talap ettiler.
Sentâbr 30-da Qırım «Devlet şurasınıñ» informatsion siyaset, bağ ve kütleviy alâqalar boyunca Komitet reisi Sergey Şuvaynikov Aqmescitteki matbuat konferentsiyasında «rusiyeli Qırım aqqında menfiy şekilde aytqan jurnalistler aqqında» bildirip, ATR jurnalistlerini de hatırlattı.
Oktâbr 3-te Krımskiye izvestiya parlament gazetasında Qırımnıñ «Cemaat palatası» reis muavini Aleksandr Formançuknıñ intervyüsı çıqtı. O, «ATR bunıñ kibi informatsion siyasetni aselet alıp barıp, Qırım qırımtatar halqınıñ razılığı olmağanda Rusiye terkibine kirdi kibi fikirlerni darqata», dep ayttı ve «arbiy strukturalar daa kendi sözüni aytacağına» ümüt beslegenini bildirdi.
Mayıs 16-da baş müdirniñ informatsion siyaset boyunca muavini Lilâ Bucurovağa ve telekanal saibi Lenur İslâmovğa Qırım «prokurorı» Natalya Poklonskaya imzalağan «ekstremistik faaliyetine qarşı ve kütleviy haber vastaları aqqında qanunlar bozulmamaq kerekligi aqqında tenbi» keldi.
