Boş vaqtım çoq olğanını endi yazğan edim. Uzun yıllar devamında ocalıq faaliyetim tesir ete: ilmiy edebiyatnıñ ögrenüvi, lektsiyalarnıñ azırlanuvı ve ilâhre, ilâhre.. Men ve başqaları tüşken vaziyet aqqında tüşüngende, birinciden talil, soñra neticelerni çıqaracaq oldım.
Demek, men işsiz qaldım, çünki vatanımnı satıp olamadım, çünki Qırımda iş tapalmayım, çünki «başqa devlet» men yaşlarğa menfiy tesir etecegimden saqına.
Men Qırımdan köçip olamayım, çünki param yoq. Ne içün yoq, dep sorarsıñız? Çünki men qapar almadım, aliy oquv yurtunıñ ocası olaraq 900 saat degil, 1100-1200 saat lektsiyalarnı oqudım, qoşma çalışmaq çette tursın, yuquma bile toymadım. Añlaysızmı? Men namuslı bir oca! Yazda daireni kiralıq bermedim, turistik ticaretinde para qazanmadım, bunıñ yerine öz bilgilerimni tamamladım (sertifikatlarnıñ sayısı qarardan ziyade).
Raatlıq künleri cemaat işinen oğraştım, grajdanlıq cemiyetiniñ peyda etilmesi üzerinde çalıştım, amma, bu iş içün, memurlar unvan, medal ve nişanlar qazandılar. Faqat, olar maña hainlik yaptılar, men ve «talebelerim» ise, küreşmege devam etemiz. Amma! Olarnıñ işi beş! Menim ise, yaramay.
Men er şeyni doğru yaptımmı? Men bellesem, e! Menim kibi insanlarğa nisbetem, menim devletim doğru davranamı? Men bellesem, yoq!
Aytıñız baqayım, qırımlılar başqa şorbacığa qullar kibi berilgende, olarğa ne teklif ettiler? Men 52 yaşındam, Qırımda doğdım, menim doğum aqqkında şeadetnamemde yazılar ukrain tilinde, 35 yıl devamında men başta Ukrain sovet cumhuriyeti, soñra Ukrainağa bergi tölegen edim. Ordu, militsiya, devlet memurları, tasil, sağlıq saqlav saası içün bergi berdim.
Ne içün men şimdi küçsiz qalıp, öz daire, maşinamı istegenim kibi qullanıp olamayım, eñ esas aqsız alda qaldım? Ne içün şimdi tilenci kibi yürmege mecbur qaldım, daa bir kere tekrarlayım, iç bir vaqıt bergilerden vazgeçmedim. Menim kibi Qırım sakinleri içün ne yapıldı? «Rusiye pasportlarnı alıñız, biz er kesni afu etermiz, emiş». Men afu etilmesini istemeyim, çünki iç bir kimsege hainlik yapmadım.
Biz yarım yıl içinde devletimizden qanunlarnı, uquqiy yardım bekledik. Mına, qanunlar çıqtı! Ukrainanıñ «Qırımda serbest iqtisadiy saası aqqında» qanunı! Şu qanun ile Qırımnıñ işğalini tanıdılar, desek yañlış olmaz!
İşte, oturıp tüşünem. Şu qanunda mülkniñ aitligini kefil etken maddelerni tapamadım. Men mülkümni qaldırıp ketsem, devlet tazminatını bermege azırmı? Aqıllı deputatlar mülkümni satın almağa ya da Ukrainada bu kibi ev, maşinanı ayırmağa azırlarmı? Çoq şey teklif ete bilem! Amma, bir netice çıqara bilem - Ukrainanıñ merkeziy akimiyeti Qırımnı tek bir territoriya olaraq körip, mında yaşağan Adamlarnı körmey!
Bu qanundan soñ, coyacaq şeyim qalmadı. Onıñ içün reklamada aytılğanı kibi - demek, sizge ketemiz!
Valentina Potapova, oca, teşebbüsçi, Yaltalı bloger
«Bloglar» rubrikasında bildirilgen tüşünceler müelliflerniñ noqtai nazarını bildirip, muarririyetnen aynı olmaması mümkün
