Qırımtatarlarnı esir aluv ve öldürüv – qırımtatarlarnıñ birligini yoq etmek ıntıluvıdır. Bundan ğayrı, bu qırımtatarlarnı Qırımdan ketmege mecbur etecek «çeçen» ve «dagestan» stsenariyleriniñ ömürge keçirilmesidir.
Bu aqqında Qırımtatar Milliy Meclisiniñ tışqı alâqalar reberi Ali Hamzin bildirdi, dep yaza Tsentr jurnalistskih rassledovaniy.
Hamzinniñ zanınca, Rusiye Qırımnı birleştirip, bizge çeçen adise-vaqiaları tarafından baqa. Anda gençlerni sıq-sıq esir alalar, soñra olarnı ölü tapalar. İç kimse de mesülietke çekilmey.
Onıñ aytqanına köre, qırımtatarlarnı esir alıp, «Qırımdaki vaziyetni kerginleştirip, ileride küç qullanmağa» isteydirler.
Ali Hamzinniñ bildirgenine köre, olarnıñ mart ayında olğan qaynaqlarnıñ malümatına köre, Kiyevde ve Rusiyede belli bir küçler çalıştı. Olar eki planğa köre areket etken ekenler. Qırımnı Rusiyege bermek ve ekincisi – Rusiyege qırımtatarlarnıñ qıtağa ketmesinde yardımcı olmaq.
Qırım.Aqiqat bildirgeni kibi, sentâbr 29-da işğal etilgen Qırımda tutıp esir alınğan qırımtatarı Edem Asanovnı Kezlevde asılğan alda taptılar.
Oğlannıñ qız qardaşı dey ki, Edem siyasetke kirişmedi, içtimaiy ağlarda bir de bir sert izaatlar qaldırmadı.
Bundan evel, sentâbr 27-de Qarasuvbazar civarındaki Sarı-Su köyünde belgisiz şahıslar eki genç İslâm Cepparov ve Cevdet İslâmovnı esir aldılar. Olarnı alâ daa tapmadılar.
Qırımtatar halqınıñ lideri Mustafa Cemilev Avropa Şurası Parlament assambleyasınıñ sessiya toplaşuvında çıqışta bulunır eken, Rusiyeniñ Qırım işğali devamında 18 qırımtatarı ğayıp olğanını ayttı.
Mustafa Cemilevniñ aytqanına köre, qırımtatar ealisine Qırımnıñ işğal akimiyeti basqı yapa, bir çoq qırımtatarı sebepsiz apiske alındı.
