Link açıqlığı

Sentâbr 29-da işğal etilgen Qırımda tutıp esir alınğan qırımtatarı Edem Asanovnı Kezlevde asılğan alda taptılar.

Qırım.Aqiqat mühbiriniñ malümatına köre, oğlannıñ cesedini Kezlevdeki baqımsız bir şifahanede taptılar.

Asanovnıñ cesedini yerli morgğa alıp kettiler. Cenaze merasimi yarın Saqta ötkerilecek.

Qırım.Aqiqat bergen malümatqa binaen, Edem Asanov sentâbr 29-da ğayıp oldı. Bu künü onı kündüz Kezlevdeki avtostantsiyasında körgen ediler.

Oğlannıñ qız qardaşı dey ki, Edem siyasetke kirişmedi, içtimaiy ağlarda bir de bir sert izaatlar qaldırmadı.

Bundan evel, sentâbr 27-de Qarasuvbazar civarındaki Sarı-Su köyünde belgisiz şahıslar eki genç İslâm Cepparov ve Cevdet İslâmovnı esir aldılar. Olarnı alâ daa tapmadılar.

Qırımtatar halqınıñ lideri Mustafa Cemilev Avropa Şurası Parlament assambleyasınıñ sessiya toplaşuvında çıqışta bulunır eken, Rusiyeniñ Qırım işğali devamında 18 qırımtatarı ğayıp olğanını ayttı.

Mustafa Cemilevniñ aytqanına köre, qırımtatar ealisine Qırımnıñ işğal akimiyeti basqı yapa, bir çoq qırımtatarı sebepsiz apiske alındı.

XS
SM
MD
LG