Link açıqlığı

Saatnıñ esas haberi

Kiyevde Rusiye elçihanesi yanında qırımtatarlarğa qol tutmaq içün numayşnı keçirecekler


Kiyevde sentâbr 25 künü, saat 12:30, Rusiye Federatsiyası elçihanesi yanında faaliyetçiler, uquq qorçalayıcılar ve jurnalistler qırımtatarlarğa qol tutmaq içün numayşnı keçirecekler.

Qırım.Aqiqat saytına belli olğanı kibi, «Areket» Qırım uquq qorçalayıcı merkezi ve Ukraina milliy cemaatlarınıñ Kongressi mitingniñ teşkilâtçıları oldı.

«Qırım Muhtar Cumhuriyetiniñ işğalinden soñ yarımadanıñ tamır halqı olğan qırımtatarlarğa nisbeten ayırımlarnıñ yañı dalğası başlandı. Reşat Ametovnıñ öldürüvi, Meclis vekilleriniñ ğayıp oluvı, qırımtatarlarnıñ binalarında, oquv yurtlarında tintüvlerniñ keçirilmesi, Qırımğa qırımtatar milliy lideri Mustafa Cemilev ve Meclis reisi Refat Çubarovğa kirişleriniñ yasaq etilmesi, qırımtatar halqınıñ teşebbüsi ile barışıq toplaşuvlarnıñ yasaq olması ve ilâhre», – denile beyanatta.

Teşkilâtçılar şunı qayd ettiler ki, Qırm «anayasasınıñ» 10-ncı maddeinde rus, ukrain ve qırımtatar tilleriniñ serbest qullanuvı aqqında aytıla. Faqat, 2014 senesi mart ayında eki ösmür telefon boyunca ukrain ve qırımtatar tillerinde laf etkende, olarnı rusiyeli teşkilâtlarnıñ azaları dögdiler.

İşğalci akimiyetniñ resmiy temsilcileri de bu maddeni körmemezlikke ura, – deyler narazılıq numayışnıñ teşkilâtçıları ve Qırımğa qırımtatar milliy Meclis reisi Refat Çubarovğa kiriş yasaqlığını qırımtatar tilinde oqup olamağan Qırım «prokurorı» Natalya Poklonskayanı añdılar.

«Qırımtatarlarnıñ aqları ep bozulmaqta. Qırım – Ukrainanıñ qısmıdır. Yarımadada qalğan qırımtatarlar qaramanlıq yapalar, çünki medeniyet, adet ve tilni saqlay ve qurtaralar, ve aynı zamanda biz er birisine qol tutmalımız ve tek numayışlarda degil de, qırımtatarlarnıñ vaziyeti aqqında er yerde aytmalımız», – deyler numayış teşkilâtçıları.

Numayışta siyasiy timsaller olmamalı, yalıñız Ukraina devlet bayrağı ve qırımtatar halqınıñ bayrağı olacaqtır.

XS
SM
MD
LG