Sentâbr 22 künü BMT ştab dairesinde tamır halqlarnıñ meseleleri boyunca Dünya konferentsiyası başlandı. Ukraina çetel işler nazirliginiñ matbuat hızmeti bergen malümatına köre, devletimizniñ eyyeti, Ukraina çetel işler naziriniñ başlığında, tamır halqlarnıñ milliy ve yerli seviyede aqlarınıñ qorçalavına bağışlanğan tögerek masada iştirak etti.
Ukraina çetel işler naziri öz çıqışında qırımtatar halqınıñ Rusiye tarafından vaqtınca işğal etilgen Qırım Muhtar Cumhuriyetinde ve Aqyarda aqlarınıñ bozuluvına yol bermemek çağırdı.
Konferentsiyada qırımtatar milliy Meclisiniñ reisi Refat Çubarov ve qırımtatarlarnıñ meseleleri boyunca Ukraina prezidentiniñ vekâletli Mustafa Cemilev de iştirak eteler. Öz çıqışında Refat Çubarov Rusiyeniñ Meclis ve tamır halqlarnıñ diger teşkilâtlarını konferentsiyağa qoymamaq sebebi ile yapılğan areketlerini takbih etti ve BMT çerçivesinde qırımtatarlarnıñ, Qırım tamır halqı olaraq, aqlarınıñ nezaretini pekitmege teklif etti.
Haber etilgeni kibi, sentâbr 22 künü New-Yorkta keçirilgen tamır halqlarnıñ meseleleri boyunca BMT konferentsiyasında Ukraina çetel işler naziri Pavlo Klimkin işğal etilgen Qırımda qırımtatarlarnıñ aqlarınıñ bozuluvına diqqat ayırdı.
