Sentâbr 22 künü New-Yorkta başlağan BMT tamır halqlarnıñ meseleleri boyunca Bütündünya konferentsiyasında Ukraina çetel işler naziri Pavlo Klimkin çıqışta bulunıp, işğal etilgen yarımadada qırımtatarlarnıñ vaziyetine diqqat ayırdı.
Bunı BMT haber hızmeti bildire.
«Yazıq ki, tamır halqlarnıñ aqları bozulğanı ile bağlı vaziyet keçmişte qalmadı», – dedi Ukraina çetel işler naziri. – Qırımnıñ Rusiye işğali ile istilâ ve açıq territorial qabaatlar ile bağlı halqara aqiqatqa qayttıq. Adet üzre, birinci sırada milliy azlıqlar qurban ola. İşğal küneşli ve musafirçen yarımadanı kerginlik, istilâ ve sabırsızlıqqa çevirdi».
Klimkin qayd etkeni kibi, «tünevin Qırımnıñ çoq milletli ve dostane yüzüniñ qısmı olğan taqımlar bugün istenilmez azlıqlarğa çevirildi».
«Böyle taqımlardan biri – qırımtatarlardır. Bugün qırımtatarlar, qavmiy ukrainliler ve diger azlıqlar açıq-aydın ayırımğa rastkeleler», – dedi Klimkin.
Nazir şunı bildirdi ki, «Rusiye Federatsiyası öz orduları ile Qırımğa nefret ğayesini kirsetti». Onıñ sözlerine köre, «insanlar başqace fikir etse, kiyinse, tüşünse, olarnı cezalaylar».
«Olarnıñ siyasiy, til ve medeniy aqlarınıñ bozuluvı boyunca er kün yañı şikâyetlerni alamız», – dedi nazir.
O şunı da qayd etti ki, bu sene qırımtatarlarnıñ sürgünlik faciasına 70 yıl ola. «2014 senesi yañı tarihiy qıyınlıqlar ile belgilenmezmi?», - dey Ukraina çetel işler naziri.
BMT tamır halqlarnıñ meseleleri boyunca Bütündünya konferentsiyasında qırımtatarlarnıñ milliy lideri Mustafa Cemilev ve qırımtatar milliy Meclisiniñ reisi Refat Çubarov da iştirak eteler.
Rusiye konferentsiya işinde qırımtatar milliy Meclisiniñ iştiragi sebebinden öz narazılığını bildirdi. Qırımda bulunğan ve andan konferentsiyağa yol almağa planlaştırğan qırımtatarlardan pasportlarını tutıp aldılar.
