Link açıqlığı

Qırımtatar milliy Meclisi Rusiye tarafından işğal etilgen Qırımda işine devam etemez. Bu fikirni Qırım.Aqiqat saytına Yaqın şarqiy taqiqatlar Merkeziniñ müdir muavini Sergiy Danilov bildirdi.

Onıñ sözlerine köre, Meclis etrafındaki vaziyet beklenilgen bir şeydir ve mütehassıslar sentâbr 14 künü keçirilgen saylavlardan soñ bu kibi ketişatnı tahmin etken ediler.

«Rusiye Federatsiyası yolbaşçılığında qırımtatar milliy Meclisni institut olaraq yoq etmek qararı alınğanı bes-bellidir», – dedi ekspert.

Sergiy Danilov şunı añlattı ki, «Novorossiya»nıñ teşkil etilmesi ile «blitskrig» amelge keçmegeni añlaşılğanından soñ, Qırımnıñ cebe yanındaki zona olaraq etilmesi yerinde büyük arbiy bazanı teşkil etmek qarar alındı.

«Cebe yanındaki zonada çeşit idare tertibatları Rusiye mahsus hızmetleri ve siyasetçiler içün havflıdır. Eger de Qırım cebe arqasında qalsa edi, Rusiye akimiyeti ile işbirlik qurulğan alda, Meclis nasıldır bir tarzda işine devam eter edi. Amma qarşılıq noqtası olğan teşkilâtlarğa küçni sarf etmege havflı bir şey olğanını tüşündiler. Meclis artıq olmaycağını tüşünem», – dedi Danilov.

Bunıñ ile ekspert şunı da bildirdi ki, Meclis işiniñ diger şekillerine keçmege ve strukturalarını saqlamağa tırışacaq.

«Yaqın zamanda merkeziy Meclisniñ işi pekitilmez, dep tüşünem, em de yerli meclislerge de barıp yeterler. Strukturanı yañıdan qurmağa kerek olur. Şimdi qıtaiy Ukrainada teşkil etilgen diasporanıñ emiyeti de ğayet büyük, gençler, ümüt ağları, şimdi kene de ağır bir yolnı keçmege kerek olur», – dey Danilov.

Sentâbr 16 künü, Meclis binasında tintüvler keçirildi. Olarnıñ neticesinde qırımtatar milliy Meclis toplaşuvlarınıñ protokolları, bilgisayarlar ve Ukraina halq deptutatı Mustafa Cemilevniñ şahsiy şeyleri tutıp alındı.

Sentâbr 17 künü «Qırım» Fondı»nıñ başı Riza Şevkiyevge Fondnıñ binasında bulunğan bütün qırımtatar teşkilâtları binanı terk etmege mecbur olğanı aqqında qararnı oqudılar.

Bundan evel, sentâbr 16 künü, Meclis binasında tintüvler keçirildi. Olarnıñ neticesinde qırımtatar milliy Meclis toplaşuvlarınıñ protokolları, bilgisayarlar ve Ukraina halq deptutatı Mustafa Cemilevniñ şahsiy şeyleri tutıp alındı.

Meclis azaları bunı «içtimaiy ceetten faal olğan insanlarnıñ qorquzuvı» olaraq tanıylar.

XS
SM
MD
LG