Sentâbr 16-da, salı künü, Ukraina Yuqarı Şurasınıñ binası yanında mecburen köçip kelgenlerniñ aqlarını qorçalamağa ve Qırımnıñ işğalden azat etilmesi boyunca qararlarnı almağa talap ettiler. Numayışnı «Qırımdan mecburen köçip kelgenlerniñ idareci şurası» cemaat birleşmesiniñ vekilleri keçirdiler.
Şu cümleden, faaliyetçiler «Köçip kelgenlerniñ aq ve uquqlarnıñ teminlevi aqqında» № 4490-1 qanun leyhasını qabul etmege ve Qırımnıñ işğal etilüvi boyunca qararlarnı almağa talap ettiler.
«Qırım – Ukrainanıñ ayırılmaz bir qısmıdır. Ve bugün Ukraina halq deputatları bunı unutmamaq kerekler. Qırım işğali boyunca malüm qararlar alınmalı. Cemaatçılıq tarafından biz «Qırımnıñ azat etilüvi içün» umumukrain areketni başlaymız», – dep bildirdi «Ukrainskiy dom» iş ve medeniy işbirlikniñ qırım merkezi» jemaat teşkilâtınıñ reisi Andrey Şçekun.
Qırımlılarnıñ numayışına Ukraina şarqiy vilâyetlerinden, ATO zonasından kelgenler de qoşuldı. Olar Donbassnı azat etip, bölünmez Ukrainanı qurtarmağa çağıra ediler.
Evel, qaçaqlarnıñ işleri boyunca BMT Yuqarı komissarınıñ idaresi Ukraina halq deputatlarını köçip kelgenlerniñ uquq ve azatlığınıñ teminlevi aqqında qanun leyhasına qol tutmağa çağırğan ediyu
Sentâbr 15 künü, Donbass ziddiyetiniñ barışıq tınçlandıruvı meseleleri boyunca vekâletli İrina Geraşçenko Ukrainada 271 biñ köçip kelgen insan bar olğanını qayd etti.
2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne AQŞ neticelerni tanımadı ve bunı Rusiye tarafından Qırımnıñ işğali olaraq sayalar.
