Aqmescit – Bu sene Qırımdan 140 musulman acılıqqa baracaq. Bu qadar yerni Saudiya Arabistanı yarımada sakinleri içün ayırdı. Müftiyatta bildirgenileri kibi, Mekkege barmağa istegenlerniñ sayısı daa çoq edi. Cedvelge ise, birinci nevbette ariza yazğanlar kirdi.
Qırım musulmanları diniy idaresi keçken aftanıñ soñunda acılıqqa barmağa istegenlerniñ arizalarnı qabul etip bitirdi. Müftiyat hadimi, Zenife Seydametova Qırım.Aqiqatqa bildirgeni kibi, cemi olaraq 200 ariza berildi. Amma, bu sene Saudiya Arabistanı 140 yer ayırdı. «Arizalarnı birinci nevbette bergen ve vesiqalarnı, paranı ketirgenler acılıqqa ketecek», – dedi Zenife Seydametova.
Aytqanına köre, bu sene qırımlılar içün Mekkege yolnıñ fiyatı 2500 dollarnı teşkil etti. Fiyat, keçken senege nisbeten bir buçuq kerege azlaştı. Müftiyatta bunı turistik operatornıñ deñişüvinen añlatalar.Bu sefer yolculuq meselelerinen «Müslim tur" rusiyeli şirket oğraşa. 2500 dollar içine yol masrafları, yemek, yerleşüv kire. Aynı zamanda Müftiyatqa ukrain turistik operatorlardan teklifler de kelgen edi, amma olarnıñ fiyatları bir adam içün 3,5 - 4 biñ dollar etrafında.
Müftiyatta qayd etkenleri kibi, qırımlılar içün kvotalar Rusiye sakinleri olaraq ayırıldı. Bu sebepten olarğa Rusiye Federatsiyasınıñ çetel pasportı kerek. Umumen alğan 2014 senesi acılıqqa Rusiyeden 16,4 biñ insan baracaq.
Tınçlıq ve amanlıq içün dua etmek
Sentâbr 8 künü, aclıqqka ketecek qırımlı musulmanlar Aqmescitte terapevtniñ teşkerüvi ve meningitke qarşı aşalamadan keçtiler.
Bunıñ episi Saudiy Arabistan qırallığı acılıq meseleleri boyunca Nazirlikniñ mecburiy şartı edi. Bu teşkerüv ve aşalamadan keçkenlerge halqara standartları boyunca sertifikat berdiler.
Eski Qırımdan Ruslan birinci kere İslamnıñ aziz yerleri sayılğan Mekke ve Medinege yol alacaq. «Men keçken sene baracaq edim, amma iç türlü çare tapalmadım. Bu sene barmaycaq oldım, amma fiyatlar ucuzlaştı. İmkânnı qaçırmayım dedim, çünki er musulmannıñ boyun borcu – acılıqtır», – dep ayttı erkek.
Ruslan er kes kibi aşılamadan keçti ve çetel pasportnı aldı. Aytqanına köre, soyları ve tuvğanları oña bu hayırlı işte qol tutalar. «Acılıq pek ciddiy bir şeydir, episi musulmanlar anda barmağa isteyler, amma er kimniñ imkân olmay», – dey ssubetdeşimiz.
Ruslan qayd etkeni kibi, muqaddes mekânlarda bulunğan vaqıtta amanlıq ve tınçlıq içün dua etecek. «Siyasetçiler bir şeyler yapalar, adiy adamlar bunı añlamaylar ve çekişeler. Er kes tınçlıq-amanlıq istey», – dep bildirdi o.
Sentâbr 17 künü Müftiyatta «Acılıq ve onıñ hususiyetleri» mevzusında seminar ötkerilecek .Müftiyat hadimleri acılıqnen bağlı suallerge cevap berip, film kösterecekler. Saudiya Arbistanına qırımlı musulmanlar Aqmescitten çarter reysi ile tahminen sentâbr 20 künü ketecekler. Acılıqnıñ özü sentâbrniñ soñunda başlap, Qurban bayramı ile oktâbrde yekünlenecek.
Acılıq – İslamnıñ 5-nci şartıdır. Muqaddes yolculıq devamında Mekkeni, Kâbeni ziyaret eteler. Quranda er qadın ve erkek ömürinde iç olmadım bir kere acılıqqa barmalı. Acılıq şartları: insannıñ musulman olması, özüni idare etmeli, acılıq içün parası yeterli olmalı, belli bir müddet içinde ötkerilmeli, sağlam olmalı.
