Aqmescit – Qırımda yerli sakinlerniñ evlerinde tintüvler devam ete. Ekstremistik kitaplarnı, afyon, silânı qıdıralar. Esasen İslamnı kütken vatandaşlar diqqat merkezinde bulunalar. Uquq-qorçalayıcılar bu vaziyetke qıymet keserek, rusiyeli akimiyet yerli ealini saylavlar arfesinde qorquzmaq istey, deyler.
Nevbet qırımlı bloger Yelizaveta Bogutskayağa keldi. Liza Bogutski tahallüsi altında, bloger çeşit neşirlerge, hususan Qırım.Aqiqatqa teñqidiy maqaleler yazıp, yollay edi.
Bogutskayanı tintüvden soñra Aqmescit rayonı politsiya bölügine alıp ketip, bir qaç saat soravdan keçirdiler. Tintüv devamında seslendirilgen sebeplerden biri olaraq Bogutskayanıñ mayıs 3 künü Qırım ile Ukraina sıñırında Mustafa Cemilevni qarşılağanı ilân etildi.
Uquq qorçalayıcı: Liza qurum içün telükelidir
Qırımnıñ adliyeviy qabulhanelerniñ ağlarında çalışqan adliyeci Alöna Luneva emin, «satqın ve terroristlerniñ» qıdıruvı – bu razı olmağan adamlarğa yapılğan basqıdır».
Adliyeciniñ fikirince, tintüv dalğası tanılmağan cumhuriyet organlarına ötkerilecek saylavlarnen bağlı. Aynı zamanda, «bu kibi siyaset sayesinde işğalge qarşı olğanlar, onı desteklemegenler qorqıp, Qırımnı terk etmelerini isteyler», – dedi Luneva.
Uquq qorçalayıcı qayd etkeni kibi, qırımlı rejissör Оleg Sentsov apiske alınğan soñ, Ukraina vatanperverleriniñ sayısı yarımadada azlaştı. «Men bellesem, qırımtatarlarnıñ evlerindeki tintüvler bu sebepten ötkerile. Liza – Ukraina vatanperveri olıp bunı gizlemey. Demek, o qurum içün telükelidir. Başqaları, Qırımda yaşap, fikirlerni açıq-aydın bildirmege mümkün olğanını körip, cesaretlene bileler. Qurum içün digerlerni ilhamlandırğan cesür insanlar kerek degil», – de y Alöna Luneva.
Tintüv dalğasından soñ, narazılıq dalğası köterilir, – Smedlâyev
Qırımtatar milliy areketiniñ iştirakçisi, Qurultaynıñ merkeziy saylav komissiyasınıñ reberi Zair Smedlâyev, Bogutskaya ile bağlı vaqialarda bir qaç aspektni qayd etti.
«Birinciden, tek qırımtatarlarnı, İslamnı kütken, camilerge barğan, ukrain devletiniñ tarafdarlarını qorquzmaq ıntıluvıdır. Ekinciden, şahsiy malümatlarnı elde etmek isteyler. Üçünciden, malümatnı bildirgen çeşit programmalarnı qoymaq nietindeler», – dep qayd etti Smedlâyev.
Milliy areket iştirakçisi, «akimiyet ile birlikte olmağan», Meclis tarafdarlarğa qarşı repressiyalar qullanılacağından saqına.
Qırımda yüz bergen vaqialar, yarımadada vaziyetni kerginleştirmek maqsadında yapıla, dey.
«Bugünki künde qırımtatarlar ve digerlerge qarşı yapılğan aqsızlıqlarğa … belli bir vaqıtqa qadar riayet etilmeycek. Amma, er kes susıp oturmağa razı degil. Narazılıq dalğası köterilir. Saylavlardan soñ, Qırımda vaziyetni kerginleştirecekler. Kimdir, şimdiki akimiyet üküm etken vaqıtta, qırımtatarlar yarımadada qalıp, rаat yaşaycaqlarını tüşünse – yañlışa. Ukrainliler ve diger millet vekilleri tamam bu vaziyette», – dey faal.
Smedlâyevniñ fikirince, Qırım arbiy bazası olaraq qabul etilse, adiy adamlarğa mında yer qalmaycaq.
Qırım.Aqiqat evelden haber etkeni kibi, soñki bir qaç afta içinde Qırımda qırımtatarlarnıñ qorantlarında tintüvler sıqlaştı. Hususan, Seyitler rayonında kütleviy tntüvler teşkil etildi.
