Link açıqlığı

Sentâbr 6 künü politsiya hadimleri Aqmeçit rayonı Mejvodnoye köyünde yaşağan iş adamı Mustafa Ametovnıñ evinde tintüv ötkerdiler. Keçken seneniñ dekabr ayında o, maşinasına minip, Nezalejnost Maydanına kelgen edi. Kiyevniñ merkezinde narazılıq bildirgenler içün pilâv pişirmek maqsadınen mahsulat ve qazan alıp ketirgen edi.

Qırım.Aqiqatqa iş adamnıñ oğlu Edem Osmanov bildirgeni kibi, tintüvniñ resmiy sebebi, Aqmeçit rayonında tükânınnıñ çaypavı oldı. Tükândan qurucılıq malzumulerni qırsızladılar. Aynı zamanda, Mustafa Osmanov özü bir qaç tükân, qavehane ve musafirhaneniñ saibidir.

«Bizge 12 adam keldi (qoruyıcı organlarnıñ vekilleri – müel. qaydları). Başından özlerini qaba tarzda alıp bardılar, biz buña riayet etmegenimizni añlap, laflarını deñiştirdiler. Biz olarğa bir şart koydıq, evimizge, kelgen episi 12 adam kirmeycek, dedik. Eki taqiqatçı, birer şaat ve videokameralarnı kirsetmege razı oldıq. Böyle şekilde tintüvni ötkermege razılıq berdik. Qalğanlar közeticiler kibi turdılar», – dedi Osmanov.

«Qırsızlanğan malzemeler arasında lesker ve qopqalar bar edi, olarnı qıdırmağa kelgenler, ne içündir yanlarına kinolog ve köpekni aldılar, qadınlarnıñ tüp urbasını qarıştırdılar?» – dep qayd ettti o.

Edem Osmanovnıñ bildirgenine köre, taqiqatçılar eski şişeni taptılar, onı narkotiklerni içmek içün qullanğan aletke oşattırdılar. «Ukrainada olğanda bizim azbarımızda 60-qa yaqın işçi yaşay edi. Olar kim bile nelernen oğraştılar. Şişe taşlar arasında saqlı edi, anda 2-3 yıl turğandır. Onı ekspertizağa alıp kettiler, - dep añlattı Edem. – Bunen beraber, eski beş yıldan berli çalışmağan pıştavnı alıp kettiler. Amma o arbiy olmağanı birden anlamaq mümkün». Taqiqatçılar şu pıştavğa ilişip, onı ballistik ekspertizağa bereceklerini ayttılar.

Edem bildirgeni kibi, evde bir şey tapmağanlar. «Er şeyni qarıştırıp çıqtılar, atta şahsiy yazı defterlerniñ er sayısını baqtılar, bir de bir şeyni tapmağa istediler», – dedi o.

Tintüvni, Osmanovlar açıqtan-açıq bildirgen fikirleri sebebinden de ötkermeleri mümkün. «Biz öz memnüniyetsizligimizni açıqtan bildiremiz, gizlemeymiz. Men, misal içün, ağamnen maşinamızda Ukraina bayrağını taşıp yüremiz, sarı-mavılı bilezlikler taqamız. Azbarımızda qırımtatar bayrağı asılı», - dey Osmanov.

Em de mevamını deñiştirmeycek olalar. «Men ne rusiyeli paspot, ne maşinağa nomerlerni, ne de rusiyeli mahsulartlarnı alam. Bizni tintüvlernen qorquzıp olamazlar», – qayd etti Edem.

Olıp keçken vaqialarnı qırımtatarlarğa basqı yapılğanınıñ isbatıdır, dey. «Şimdi qırımtatarlarğa basqı yapacaq olalar. Olar(qoruyıcı organlar, - müel. qayd. ) bizni beşinci kolonna olaraq köreler. Elbette, biz şimdiki akimiyetke qol tutmayıq, işğalni desteklemeyik, demek kırımtatarlarnı tınçlandırmaq kerek. Böyle etip, olar basqı yapıp, psihologik stress yapalar. Amma, biz çoq şey kördik, onıñ içün bizge böle variant kelişmey», – dedi Edem Osmanov.

Qırım.AQiqat evelden bildirgeni kibi, soñki aftalar devamında Qırımda qırımtatar qorantalarında tintüvler ötkerildi. Qoruyıcılar evlerge silâ, afyen, yasaq etilgen edebiyatnı qıdırmaq sebei ile atılıp kireler. Soñki kütleviy tintüvler Seyitler rayonında ötkerildi.

XS
SM
MD
LG