Link açıqlığı

Saatnıñ esas haberi

Qırımda Ukraina içün em hristianlar, em musulmanlar dua ettiler


Rusiyeli yarımadanıñ kilse ve camilerniñ ekseriyetinde cuma künü, sentâbrniñ 5-nde Ukrainada amanlıq, barışıq olması içün dua merasimleri teşkil etildi. Tedbirler Qırım dinlerara şurası tarafından teşebbüsinen ötkerildi.

Aqmescitniñ Pötr ve Pavel kafedral kilsesinde Aqmescit ve Qırım mitropoliti Lazar reberliginde dua merasimi keçirildi. Merasimniñ soñunda Lazar toplaşqanlar ögünde çıqışta bulundı, Ukrainada tınçlıq, sevgi, birlik, barışıq üküm sürmesi içün dua etmege rica etti.

«Viran etilgen evler, ğayıp etilgen ömürler, qayğı, insanlarnıñ çekişmeleri. Bunıñ episine baqqanda, insan günâhınıñ havflığı aqılına kele», – dedi o.

Saba kilsege kelgen sakinlerniñ bazıları dua ne sebepten keçirilgenini bilmegenler. Qırım ve Aqmescit mitropoliti muracaatta bulunğan vaqıtta, adаmlar barışıqnıñ tiklenmesi içün çıraqlarnı yaqtılar. İhtiyar yaşına kelgen dindarlar köz yaşlarını tutalmadılar.

Qırımnıñ baş cuma camisi Kebir camisinde Ukrainanıñ şarqında ateşniñ toqtatılması içün Allahqa yalvardılar. Yüzlerce musulmanlar Aqmescit merkezinde toplaştılar.

«Aqmescitniñ merkeziy camisi, em de yarımadanıñ er camisinde dua merasimleri ötkerildi, Allahqa Ukrainanıñ cenüp-şarqındaki cenkni toqtatması, qan tökülmesi, ağa-qardaşnıñ öldürüvine yol bermemesi içün dua etildi», – dep bildirdi Qırım müftisiniñ muavini Ayder İsmailov.

O qayd etkeni kibi, qırımtatarlar Allahnıñ olarğa birlik ve amanlıq, em de barışıq olğan yerde onı saqlap qalmasını rica ettiler.

Ukrainada barışıqnıñ pekitilmesi içün dua keçirmek teşebbüsi, sentâbr 4 künü, Qırımnıñ Milletlerara şurasınıñ «Dünya – Allahnıñ emaneti» toplaşuvında seslendirildi. Şu toplaşuvda Qırımnıñ öz başına tayin etilgen baş naziri Sergey Aksönov iştirak etken edi.

XS
SM
MD
LG