İşğal etilgen Qırımda musulmanlarnıñ evlerinde tintüvler devam ete. Bunı qullanıcı Osman Arifm Facebook saifesinde bildirdi.
«Al-azırda Asan ve Susanna Ablayevlerniñ qorantasında tintüv keçirile. (Seyitler rayonı). Paralamovlar ailesinde de (Seyitler rayonı)», – dep yaza o.
Arifmnıñ aytqanına köre, «nizam hızmetçileri» eki metrlik araba qapusında keçip, silâ qullanıp, qorqqan, ne olğanını añlamağa yetiştirmegen yaş musulman qadınını ve aileniñ diger azalarını divar yanında topladılar.
«Ufaq balanı qorquzdılar. Er vaqıt olğanı kibi musulman qorantalarında silâ, narkotiklerni qıdıralar. Birazdan belli olğanına köre, Seyitler rayonında tintüvler birden dört evde keçirile, olardan üç ev din kütken musulman qorantalarına ait!», – dep yaza qullanıcı.
Qırım.Aqiqat bildirgenine köre, işğal etilgen Qırımda qırımtatar qorantalarında tintüvler devam etip başladı. Avgust 28-de saba Bağçasarayda İbragimovlar ailesine yerli «politsiya» ve kamuflâj urbasında silâlı adamlar keldiler.
Arbiyler qırımlınıñ evini teşkerip, diniy kitaplarnı alıp kettiler. Olarnıñ aytqanına köre, bu edebiyat Rusiyede yasaq etilgen ve ekstremistik kitaplar cedveline kirsetilgen.
Bundan evel Bağçasarayda yaşağan Muslâdinovlar ailesiniñ evinde tintüv keçirildi.
Bundan ğayrı, Qırım medreselerinde kütleviy tintüvler keçirile. Böylece, avgust 13-te Aqmescitniñ üç musulman oquv yurtında tintüvler olıp keçti.
