Link açıqlığı

Rusiye müftisini yañı Qırım Müftiyatına alâqası bar olğanı aqqında haberni añlatmağa rica eteler


Qırım musulmanlarınıñ müftisi hacı Emirali Ablayev Rusiye musulmanları merkeziy diniy idaresiniñ reisi, müfti Talgat Tacuddinge muracaat etip, matbuat vastalarında onıñ Qırım musulmanları merkeziy diniy idaresiniñ («Tavriya müftiyatı») tesis etilmesine alâqası bar olğanı aqqında haberni añlatmağa rica etti.

Mektüp metni Qırım Müftiyatınıñ saytında derc etildi.

Emirali Ablayev öz muracaatında qayd ete ki, kütleviy haber vastalarında tarqalğan malümatqa köre, Qırımda Talgat Tacuddin yardımı ile Qırım musulmanlarınıñ tarihiy diniy idaresi – «Tavriya müftiyatı» – «ğayrıdan tiklenile». Qırım musulmanlarınıñ müftisi bildire ki, bu malümatnı red etken birisi olmadı.

«Tavriya Müftiyatınıñ meydanğa ketirilmesine munasebetiñizni aydınlatmağa, matbuat vastalarında tarqalğan malümat yañlış olğan olsa ise, onı resmiyen red etmege rica etemiz», – dep aytıla muracaatta.

Emirali Ablayev hatırlattı ki, doqsanıncı seneleriniñ başında qırımtatarlar sürgünlik yerlerinden kütleviy şekilde Vatanğa keri qaytmağa başlağan soñ, musulmanlarnıñ yekâne idaresi aqqında mesele peyda oldı.

«1995 senesi noyabr 18-de Qırım musulmanlarınıñ I Qurultayı olıp keçti, tedbirde musulman cemiyetleriniñ 233 delegatı iştirak etti, em de Qırım musulmanları Diniy idaresi şekillendirildi, onıñ nizamnamesi belgilendi ve müfti saylandı», – dep hatırlattı Qırım musulmanlarınıñ müftisi.

Malüm olğanı kibi, Qırımda Qırım musulmanları merkeziy diniy idaresi tesis etilgen edi – Tavriya müftiyatı.

İşbu qarar Aqmescitte yarımadanıñ farqlı rayonlarından 100 delegatnı toplağan musulman qurultayında qabul etildi

Müfti olaraq Ruslan Saitvaliyev saylandı, reis vazifesine Enver Ahtemov tayin etildi. Rusiye musulmanlarınıñ merkeziy diniy idaresiniñ yolbaşçısı müfti Talgat Tacuddin Müftiyat tiklenmesine yardım etti.

XS
SM
MD
LG