Qırımtatar halqınıñ lideri ve Ukraina halq deputatı Mustafa Cemilev Rusiye tarafından işğal etilgen Qırım Ukraina terkibine bir yıl içinde qaytacaq, dep ümüt ete.
Bunı o Apostrof neşirine bergen intervyüsında bildirdi.
«Men bilse edim (işğal ne qadar devam etecegini – muarrir)... Yıldan ziyade devam etecegini qorqam. Lâkin ep bir bu müddet tezce yekünleycegine ümüt etem», – dedi o.
Onıñ aytqanına köre, yarımadanıñ tez qaytuvına ümütlerden sebep, Meclis qırımtatarlarnı Qırımnı terk etmemege çağıra. Lâkin halqnıñ aman-aman yedi-sekiz biñ temsilcisi ketmege mecbur oldı.
«Bizler yıllardır olarnıñ vatanğa avdet olması içün küreştik, şimdi ise bu Putin adamlarnı ketmege mecbur ete! Bizler sabır etmege rica etemiz, bu çoqqa sürmeycektir. Lâkin azatlıqnı sevgen insanlar şimdi Qırımda qurulğan totalitar rejimine alışıp olamaylar», – dep qayd etti Cemilev.
Qırımtatarlarnıñ lideri dedi ki, Qırım sakinleri işğal vaqtınca olacağını añlaylar: misal olaraq, onıñ aytqanına köre, yarımadada mal-mülk añlaşmaları yoq.
«Şimdi anda bir de bir añlaşmalar tizilmey – ne topraq meseleleri, ne de alış veriş añlaşmaları. Böyle resmiyleştirüv qanunsız olacaq, ve adamlar işğal yekünlengen soñ olarnı ğayrıdan baqacaqlarını bileler», – dedi Cemilev.
Cemilevniñ qayd etkenine köre, o, prezidentniñ qırımtatar halqınıñ işleri boyunca vekili olğan soñ, qırımtatarlar içün müim bir mesele çezilmesine isse qoştı, misal olaraq, yarımadada köy ve şeerlerniñ eski adlarını ğayrıdan tiklev meselesi.
«Tabiiy ki, işğalciler şeer ve köylerniñ adları ile işaretlerni deñiştirmege bermezler. Lâkin adamlar tarihiy toponimika ğayrıdan tiklengenini bilseler, hususan qırımtatarlar, şeer ve köylerni aynı böyle adlarını aytacaqlar», – dep añlattı Cemilev.
Qırım.Aqiqat malümatına köre, Ukraina halq deputatı Mustafa Cemilev ve Qırımtatar Milliy Meclisiniñ reisi Refat Çubarov Latviyağa yol alıp, evelden planlaştırılğan körüşüvlerden ğayrı, apishaneni ziyaret ettiler.
