İsmail Gasprinskiy adına qırımtatar kütüphanesi ilk sefer qırımtatar tilinde soqur balalar içün mahsus Brayl elifbesinde basılğan kitaplarğa malik oldı. Bu – Gans Hristian Andersenniñ «Qalai soldatçıq» ve «Bülbül» masallarıdır. Kitaplar «G.A. Andersen. Masallar.- Simferopol. Krımgosizdat. 1941» esasında İ. Gasprinskiy adına qırımtatar kütüphanesiniñ sımarışı ile Çelâbinskteki közleri zayıf ve soqur balalar içün mahsus vilâyet kütüphanesinde basıldı.
Qırımtatar kütüphanesi direktorınıñ ilmiy işler boyunca muavini Leylâ Qadırovanıñ Qırım.Aqiqat saytınıñ mühbirine bildirgenine köre böyle mahsus edebiyatqa ihtiyac endi çoqtan mevcut olıp, onı qandırmaqnıñ imkânı olmağan.
- Çelâbinsk közleri zayıf ve soqur balalar içün mahsus vilâyet kütüphanesiniñ hadimleri ile biz Sudaqta kütüphaneciler halqara seminarında tanış olıp, iş tekliflerinen paylaştıq, - dey Leylâ Qadırova.
İ. Gasprinskiy adına kütüphane hadimleri bütün dünya balaları sevip oquğan meşur masalcınıñ qırımtatar tilinde taa sürgünlikten evel neşir etilgen kitabını skanerden keçirip Çelâbinske yollaylar. Andaki zenaatdaşları ise közleri aciz oquyıcılarğa yardım etmek maqsadında eki masalnıñ ekişer nushasını bedava yapqanlar. Kitaplarnıñ baş saifesinde 5 nusha kösterilgen, lâkin şimdilik ancaq 4 nushası kelip çıqqan. Şulardan bir nushası kütüphane Aqmescitteki körlar cemiyetine berilecek.
Leylâ Qadırovanıñ aytqanına köre Brayl elifbesinde basmaq içün kitaplar ileride qırımtatar yazıcıları ve ocalarınıñ iştirakinde seçilecek.
- Bu kitaplarnı közleri zayıf balalar nasıl qabul etecekler, kitaplar ne derecede talap etilecegini ögrenmege qarar berdik. Buña köre de qalğan nushaları basılacaq, - dey Qırımtatar kütüphanesi direktorınıñ ilmiy işler boyunca muavini.
– Yaqın künlerde Sankt-Peterburgdan da mahsus edebiyat kelmesini bekleymiz. Kelecekte közleri zayıf büyükler içün de kitap sımarlamaq meramındamız.
