Link açıqlığı

FHH Qırım musulmanlarını sıqıştıra


Aqmescit – Qırımda ekstremistik edebiyatnı qıdırıp, balalarğa diniy bilgilerni berüv müessiseleri – medreselerde tintüvler keçireler. Qırım musulmanları diniy idaresiniñ malümatına köre, tintüv tedbirlerinde Federal Havfsızlıq Hızmeti (FSB) iştirak ete. Uquq qorçalayıcılar bu kibi areketlerni yerli musulmanlarnı qorquzmaq maqsadında yapılğanını aytalar. FHH bu vaziyetni izaat etmekten vazgeçti.

Avgust 13 künü Aqmescit civarındaki birden 3 medresesinde tintüv ötkerildi. Bunı Qırım.Aqiqatqa Müftiy muavini Esadullah Bairov bildirdi.

Aytqanına köre, medresege apansızdan FHH, prokuratura, sanitar-epidemiologik stantsiyası, «tasil nazirligi», yanğın ve diger hızmetlerniñ vekilleri keldiler.

Tintüv neticesinde yasaq etilgen kitaplar cedveline kirgen 3 kitap tapıldı.

Bairov qayd etkeni kibi, teşkerüv aqqında evelden bildirmediler, onı hadimler raatlıqta bulunğan vaqıtta ve tamir işleri keçirilgende teşkil ettiler.

«Medrese hadimleri bizim emirimizni daa yerine ketirip yetiştirmegenini bilip-turıp, gizliden keldiler. Sanki dersiñ, yaqalamağa istediler. Hatalarnı tapıp, olarnı qullanmağa istediler. Oquv yılına eki afta qalğanda, tüzetmek içün bir qaç ay kerek olğan hatalar cedvelini taqdim ettiler. Olarnıñ maqsadları bu kitaplarnı tapmaq edi, ğaliba, çünki oquv ceryanı başlap, bir ay devam etken soñ kelgen olsa ediler, Müftiyatnıñ ekstremistik edebiyatınen bağlı emiri yerine ketirilir edi», – dedi Müftiyat vekili.

Bairov aytqanı kibi, basqığa baqmadan medreseler faaliyetlerini devam etecekler. Oquv yurtlarnı ğayrıdan qayd etmek ve kerekli litsenziyalar almaq içün azırlaylar.

«Biz işimizni soñuna qadar yapacaqmız ve musulmanlarnıñ din bilgilerni almaq aqqını qorçalaycaqmız», – dedi Bairov.

Bunen beraber, Müftiyat hadimi camilerniñ birinde ve musulman qorantasında tintüvler ötkerilgenini tarif etti.

Tintüvlerni qorquzmaq içün ötkereler, – uquq qorçalayıcı

Qırımnıñ uquq qorçalayıcılar areketiniñ reisi Enver Kadırov bu areketlerni qorquzmaq içün ötkerilgenini ayttı.

Qırım.Aqiqatqa vaziyetni izaatladı: «Ekstremistik kitaplarnıñ bulunuvı Qırım musulmanlarnı kütleviy şekilde repressiyağa oğratmaq içün bir sebep ola bile».

Kadırovnıñ fikirince, yarımadada yaşağan musulmanlar islamnı yasaq etmege isteyler, dep tüşüneler.

Qayd etkeni kibi, «bu vaziyette musulmanlar tek Allahqa sığınıp, yaşaylar, çünki Qırımda muracaat etilecek bir de bir appelâtsion müessise yoq, tek şimdiki akimiyetniñ qararı bar».

Rusiyeniñ Qırımdaki Federal Havfsızlıq Hızmeti izaattan vazgeçti

Evelden haber etilgeni kibi, Müftiyatta «soñki vaqıtları islam oquv yurtlarında, din vekilleriniñ şahsiy evlerinde teşkerüv ve tintüvler ötkerilip, mahsus cedvelge kirsetilgen ve Rusiyede yasaq etilgen ekstremistik edebiyat araştırıla».

Yasaq etilgen kitaplar cedveli Rusiye Federatsiyasınıñ çeşit mahkemeler qararları esasında tertip etilip, 200 saifeden ibaret, onda çeşit dinlerge ait 2 biñden ziyade kitap kirsetilgen.

Dindaşlarnı qorçalamaq içün Qırım müftiyatı islamnen bağlı yasaqlanğan kitaplarnıñ cedvelini öz saytında yerleştirdi.

XS
SM
MD
LG