Aqmescit – Birinci qırımtatar ATR kanalı er keske onıñ aktsiyalarnı satın almağa teklif etti. Eñ yaqın vaqıtta kompaniya açıq aktsioner cemiyetine çvirilip, müdirler şurasını saylaycaq ve baş müdirni belgileycek. Kanalnıñ reberleri bildirgeni kibi, böyle sürette ATR kelecekte olması mümkün meselelerden qorunmağa, ve seyircilerden maliye cietinden destek alacaq. Ekspert ve közeticiler bu ğayege farqlı davranalar.
Bu afta ATR alelhusus teşebbüsnen çıqtı. Telekanal vatandaşlarğa muracaat etip, «ATR GRUP» açıq aktsioner cemiyetiniñ meydanğa ketirilüvi aqqında haber etti ve er kesni bu işte iştirak etmege çağırdı.
Telekanalnıñ saytındaki bildirmede: «Teşkilâtçı ve aktsioner olaraq qayd etilmege isteseñiz, pasport malümatlarını ve arizanı yazmalısıñız», – dep aytıla. Arizalarnı avgustnıñ 21-ne qadar qabul etecekler. Bir aktsiyanıñ fiyatı 1000 ruble tura. Umumen 150 000 aktsiya satıla. Böyleliknen, cemi aktsiyalarnıñ fiyatı 150 mln ruble etrafında (50 mln grivna etrafında).
Cuma ertesi künü, avgustnıñ 23-nde teşkilâtçı ve aktsionerlerniñ toplaşuvı ötkerilecek, «ATR GRUP»nıñ nizamnamesi tasdiqlanacaq, müdirler şurası saylanacaq, baş müdir ve teftiş komissiyasınıñ azaları belgilenecek, müürniñ eskizi ve diger qararlar qabul etilecek.
Telekanal reberleri aytqanı kibi, açıq aktsioner cemiyeti olğanı ATR-niñ satıluvınen bağlı degil. ATR-niñ müdir muavini Lilâ Bucurova «Telekritika»ğa bildirgenine köre: «Bu kanalnıñ satıluvı degil. Biz eki maqsad qoydıq – birinci ve eñ müim özümizni qorumağa isteymiz, bir taqım aktsionerlerge baqqanda, bir adamnı daa qolay bastırmağa. Onıñ içün seyircilerge muracaat etip, bu adliyeviy sualni çezmege rica etemiz, bizni qapatmasınlar. Ekinci maqsadımız- bütün dünyağa biz ayırı bir şahısnıñ degil de, dünyada birinci ve yekâne qırımtatar telekanalı olğanını köstermege isteymiz».
Aynı zamanda telekanlda büyük yatırım qazanmaycaqlarını bileler. «Bugünki şaraitlerde kanal kârlı olmaycağını añlaymız. Ve aktsiyalarnı satıp, çoq para elde etalmamız, dep tüşünemiz. Biz bu leyhanı azırlağanda, kimdir aktsiyalarnıñ 50 % -nı satın alacağından saqına edik. Amma, bunı yapalmazlar», – dep işandırdı Bucurova.
Qayd etkeni kibi, ep bir idare etici aktsiyalar iş-adamı, «ükümetniñ» sabıq «baş nazir muavini» vazifesini eda etken Lenur İslâmovnñ qolunda qalacaq ve yañı aktsionereler kanalnıñ siyasetini deñiştirmezler. Amma, telekanal kerçekten seyircilerniñ maliye destegine muhtac.
«Reklama ticareti saası çoq eyi durumda degil. Amma, keçken yaznıñ seviyesine qadar kötereleceginde belli bir tahminler yoq. Aynı zamanda, telekanalnıñ ciddiy meseleleri bar. Ciddiy, amma müşkül degil», – dedi Lilâ Bucurova.
Hatırlatamız, iyül ayında ATR-niñ baş müdiri Elzara İslâmova Qırım.Aqiqatqa intervyü bergen vaqıtta, telekanal aktsioner cemiyetine çevirilecegi aqqında aytqan edi. Aytqanına köre, şimdiki vaqıtta, kanalnıñ kârı 70 % -ğa eksildi. «Şimdi yavaş-yavaş ayaqqa köterilemiz, amma ğayıplarımız pek büyük. Mart ayındai vaqialardan evel, er ay reklamanı arttıra edik ve aman-aman masraflarımıznı qapata edik. Şimdiki vaziyette masraflarımıznı qısqarttıq, amma, bizim mahsulatımıznıñ keyfiyeti ve sayısına tesir etmeyceginde eminmiz», – dep aytqan edi İslâmova.
Muarririyet siyaseti içün eyi bir teşviqat
Kiyevdeki bloger ve teñqidçi, «Telekritika» leyhaları neşirniñ muarriri Natalya Ligaçevanıñ fikirince, telekanal kendi aktsiyalarnı er kimge teklif etkeni normal bir aldır.
«Elbette, maliye meseleleri olğanını isbatlay bile, ya da yatırımcınıñ ileride de leyhağa para masraf etmege istemegeninen bağlı»,– dep ayttı Ligaçeva Qırım.Aqiqatqa. «Adamlar leyhanı destekleseler – leyha muvafaqiyetli olsa, muarririyetniñ siyasetini teşviq ete bile. Amma o nasıl ola bile – işğalcilerge nisbeten munasebti nasıl olacaq – bu sual açıq qala», – dep ayttı baş muarrir.
Qırımlı mühbir ve mediamenecer Aleksandr Yankovskiy bildirgeni kibi, aktsiyalarnıñ satıluvı iqtisadiy meselelerni çezip olamaz.
«Reklama ticareti olmasa, ya da parası az olsa, aktsiyalarnı satıp ta reklama ticaretini meydanğa ketirip olamazlar, – dedi Yankovskiy Qırım.Aqiqatqa. – 1000 aktsiyanı 1000 rublege sat, million ruble alırsıñ. Tahminen 30 biñ dollar olur. Yarım ay içün aylıq berip olursız. 20 000 aktsiyanı satsañ – bir yılğa yeter».
Qayd etmek kerek ki, şahsiy kanal aktsiyalarnıñ açıqtan-açıq satıluvı Qırımda birinci ötkerile. Bundan evel, yerli kanallarnıñ iç biri bu kibi usullarnı qullanmağan edi.
Qırım.Aqiqat bu mevzuda soqaqta sorav keçirdi. Biz qırımtatarlardan ATR aktsiyalarnı satın almağa azırlarmı, dep soradıq.
