Aqmescit – Prezident Vladimir Putin Yaltada Rusiye Delvet Duması deputatlarınen körüşüvi devamında bir sıra beyannameler yaptı. Rusiye devleti reberiniñ sözlerine köre, Kreml siyasette olğan kerginlikni al etmek içün adım yapmaycaq. Rusiye reberleri Qırımnı bütün cemaatçılıq içün bir «ilâc» olaraq qullanmağa istey, qabul etilgen sanktsiyalarnı doğru dep saya ve mudafaa saasına dünya parasını sarf etmek niyetinde.
Aqyar ve Yaltada yol areketi sıñırlandı, deñiz naqliyesiniñ sayısı qısqartıldı. Avtomobil yollarını Rusiye devlet inspektsiyasınıñ hadimleri toldurdılar. Soñki künleri Qırım üzerindeki kökte gelikopter ve arbiy uçaqlar nevbet tutmaqtalar. İşte, bu künleri Yaltada Rusiye ükümeti yolbaşçısı Dmitriy Medvedev reberliginde memurlar ve parlament deputatları toplaşuvnı keçireler. Olar mında Vladimir Putinniñ yarvmada ekinci ziyareti çerçivesinde keldiler.
Qırım.Aqiqat yerli sakinler arasında keçirgen sorav neticelerine köre, Putin qırımlılarnı ayrette qaldıra.
Ziyaretniñ eñ müim noqtası Putinniñ deputatlarğa yapqan muracaatı oldı. Bazı közeticelerniñ fikirince, şu nutuqta Rusiye prezidenti Ukraina ve bütün dünyağa ilerideki adımlarnen bağlı mesaclar bildirmek kerek edi.
Qırım Rusiye içün bir «ilâctır»
Putinniñ nutuğında 20-nci asırnıñ başında vatandaşlara cenki mevzusı seslendirildi. Onıñ aytqanına köre, «drammatik bölünüv», «yaralar»nı Qırım tedaviylemek kerek, ve böyleliknen rus cemiyetini birleştirmeli. Çünki, Pütinniñ sözlerine binaen, tamam Or-Qapuda «rus rusnı öldürgen edi».
Qırımda referndumnıñ ötkerilüvi devamında Rusiye basqı yapqanı aqqında qabaatlavlarnı Rusiye prezidenti «aqılsız, külünçli ve boş» kibi adlandırdı. O, «Qırım işğal etilmedi», dep ayttı.
Aynı zamanda, Rusiye kerçekten de yarımadada kendi arbits küçlerini qullanğanını tasdiqladı, amma, bunı «referendum devamında Qırımda telükesizlikni temin etmek içün» yapqanını qayd etti.
Sözde üç tilli cumhuriyet ve Qırımğa sarf etilecek 700 milliard
Ekinci mesac tillerniñ musaviyligi ve sürgün etilgen halqlarnıñ aqlarınen bağlı edi. «Repressiyalarğa oğratılğan halqlarnıñ aqlanuvınen bağlı iş tolusınen ötkerilmeli, rus, ukrain ve qırımtatar tillerniñ kerçek musafiyligi temin etilmeli», – dep qayd etti Rusiye prezidenti. Bu vaqıtta ise, Qırımda ukrain sınıfları qapatılğanı, mektep programmalarında ukrain tili saatlarnıñ qısqartıluvı ve qırımtatar tiliniñ sıqıştıruvı qayd etile.
Ukrainadaki vaziyetni Rusiye yetekçisi «qanlı haos» ve «ağa-qardaşlar arasındaki qanlı dava” olaraq beligiledi. Aynı zamanda, Ukraina akimiyetini öpkelep, olar diger vilâyetlerniñ meselelerini çezip, Qırımdan «çoq alıp, az bergenlerini» bildirdi.
Putin, Devlet Duması deputatları Qırımnıñ inkişafı boyunca programmağa qol tutarlar, dep işana. 2020 senesine qadar maliye programmalarına 700 million rubleden ziyade sarf etilecek. Prezidentniñ sözlerine köre, Qırımda sanayı, köy hocalığı, içtimaiy ve turistik saalarını inkişaf etmek kerek.
Rusiyede insan aqlarına riayet etilmemesi de mümkün
Sanktsiyalarnen bağlı suallerge cevap bererek, Putin, Rusiyeniñ cevap olaraq qabul etilgen sanktsiyalar milliy istisalcılarğa qol tutıp, yañı şeriklerni tapmaq maqsadında yapılğanını bildirdi. Ve, olar bundan evel Rusiyege qarşı «esassız ve qanunsız» sanktsiyalarnı qullanğan devletlerge nisbeten çalışacağını hatırlattı. Vladimir Putin Rusiye, insan aqları boyunca Avropa mahkemesine artıq boysunmaycaq mümkünligini da bildirdi, amma şimdi bu mesele «kün tertibinde turmay», dep ayttı.
Rusiye ordusı yañı silâ elde etecek
Vladimir Putin Qırımda rusiyelilerni azır olmağa çağırdı. Aynı zamanda memleketniñ mudafaa-sanayı saasına - 20 trillion rubleni ayırmağa vade etti. Bu programma çerçivesinde rus orduları eñ zemaneviy silânı elde etmeliler. Pütinniñ aytqanına köre, bütün dünyanıñ bu silâ aqqında haberleri daa yoq.
Hatırlatamız, Rusiye Qırımnı bu yılnıñ mart ayında işğal etti. Dünyanıñ ekseriy devletleri yarımadanıñ qoşuluvını qabul etmeyip, onı ukrain topraqları dep sayalar. Ukraina tış işler nazirligi Rusiye prezidentiniñ ziyaretini iç qabul etilmeycek bir vaqia olaraq adlandırdı.
