Link açıqlığı

Cemilev: NATOda Qırımnıñ Rusiye işğalinden azat etilüvi yaqın zamanda olacağına işandıralar


NATO ştab-dairesinde Rusiyege nisbeten kirsetilgen cezalar Qırımnıñ Rusiye işğalinden azat etilüvine ketirecegine işandırılar.

Bunı işğalden soñ yarımadağa kirişi yasaq etilgen Ukraina halq deputatı, qırımtatarlarnıñ milliy yetekçisi Mustafa Cemilev Espreso.TV efirinde bildirdi.

«Meni Brüsselde, NATO ştab-dairesinde, Rusiyege nisbeten kirsetilgen cezalarnıñ tesiri büyük olacağına işandırdılar. Ve işbu cezalar SSSRnıñ Afganistanğa kirgen vaqıtta olğan cezalardan daa da ciddiy olacağını qayd ettiler. Men bunı, ğaliba, endi körmeycegimni ayttım. Olar ise: «Yoq, o qadar uzanmaz», – dep cevap berdiler», – tarif etti Cemilev.

Onıñ sözlerine köre, qırımtatarlar Rusiye işğalinden azat olmaq içün atta qıtadan suvnnıñ qapatıluvına dayanıp olurlar.

«Semetdeşlerim telefon açıp: «Qırım içün suvnı ne zaman qapatacaqsıñız?», – dep soralar. Yani, serbest olmaq içün olar buña da çıdamağa azırlar», – dedi Cemilev.

«Qırım mıtlaqa qaytacağına şübelenmeyim. Bugünki vaziyet bütün halqara qaidelerge ters kele. Sanki XXI asırda konkistadorlar kelip, toprağımıznı tutıp aldılar. Ertemi-keçmi, amma Rusiye keri qaytır. Rusiyede «devlet şerefi» degen bir şey qalmadı. O, Şimaliy Koreya kibi oldı»,– dey Cemilev.

2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, Ne Avropa birligi, ne AQŞ neticelerni tanımadı ve bunı Rusiye tarafından Qırımnıñ işğali olaraq sayalar.

Bundan soñ Rusiyege nisbeten Avropa birligi, AQŞ ve diger memleketler sıqı sürette cezalarnı kirsete.

XS
SM
MD
LG