Link açıqlığı

Devlette cenk ketse bile, Ukraina Qırımnı unutmamaq kerek, deyler mütehassıslar. Olarnı fikirince, qırımtatar ealisiniñ qorçalanuvı, olarnıñ Ukraina tamır halqı olaraq ilân etilüvi işğalnen küreşmek içün yardım ete bile.

Ukrainanıñ yañı Anayasasında yarımada qırımtatarlarnıñ milliy territorial muhtariyeti olaraq qayd etilmek kerek. Bu fikirni Qırım mütehassıslar merkezi idaresiniñ reisi Andrey Klimenko bildirdi. Onıñ fikirince, bunıñ episi Ukrainanıñ yarımada içün küreşte yardım ete bile.

Andrey Klimenko,
Andrey Klimenko,

Bundan da ğayrı, Ukraina prezidenti Pötr Poroşenko, Ukraina territoriyasında Qırım Nazirler Şurası çalışqanı aqqında mahsus avaleni çıqarmaq kerek. Böyleliknen, qırımtatarlarnıñ aqlarını yüksek uquqiy seviyede qorlamaq mümkün olacaqtır. Klimenko aytqanı kibi, bu organ işğal etilgen Qırımğa qomşu olğan Herson vilâyetinde faaliyet köstermesi kerek.

«Bu nazirler Şurası, em qırımlılarnıñ, em de andan köçkenlerniñ işlerinen meşğul olmalı», ̶ dep qayd etti o.

Qırım meselesi Ukraina içün eñ müim meseleler sırasında olmalı – Çubarov

Qırımtatar halqı lideri Mustafa Cemilevniñ fikirince, qırımtatar halqı aqlarınıñ qorçalanuvı Ukrainağa Qırımnı qaytarmağa yardım eter. Hususan, eñ yaqın vaqıtta qırımtatar halqı tamır halq olaraq ilân etilmeli. 2007 senesi, BMT Baş assambleyası tamır halqlar aqqında deklaratsiyasını qabul etkende, Ukraina oña qol tutmadı.Cemilev qayd etkeni kibi: bu vesiqa vaqtında qbul etilgen olsa edi, işğal vaqtında halq qorçalanğan kibi olur edi. «Tamır halqnıñ razılığı olmadan, onıñ territoriyasında cenkler alıp barılmay ve arbiy qısımlar yerleştirilmey», – dep, Mustafa Cemilev Deklaratsiyanıñ maddelerinden birini bildire.

Refat Çubarov
Refat Çubarov

Meclis reisi Refat Çubarovnıñ fikirince, Qırım meselesi Ukraina içün eñ müim meseleler sırasında olmalı. Onıñ sözlerine köre, yarımadanıñ qaytarıluvı Donbasstaki tınçlıqnıñ pekinleştirilüvinen birlikte olmalı.

«Kimdir belki de, başından antiterroristik operatsiyasını bitirip, soñra Qırımnı tüşünirmiz, dep belleydir, amma, bugünde bugün bu kibi teklifler bizge kelişmey. Em birinci, em ekinci, em üçüncisi bir sırada olmalı», – qayd etti Çubarov.

Mütehassıslarnıñ fikirince, qırımtatar halqı aqlarınıñ qorçalanuvı, Rusiye ile küreşte belli bir küç berir.

Радіо Свобода

XS
SM
MD
LG