Rusiyeniñ Federal havfsızlıq hızmeti Ukraina ve Qırım arasındaki memuriy sıñırnıñ nezaret-kiriş noqtalarından birinde qırımtatar faali İsmet Yükselge yarımadağa kirişni yasaq etti.
Bunı Qırımtatar Milliy Meclisiniñ reisi Refat Çubarov Facebook saifesinde bildirdi.
Onıñ aytqanına köre, vaqia bugün saat 07:00 olıp keçti. İsmet Yüksel Faalniñ apayı Gayana ve qızı Canike ile birlikte çetelden qaytqan edi.
«İsmet Yüksel 1968 senesi Türkiyede dünyağa kelgen qırımtatarıdır. 1995 senesi tarihiy Vatanına qaytıp keldi, 1999 senesi qoranta qurdı. İsmet Yükselniñ apayı – Gayana, 2013 senesiniñ oktâbr ayından berli – Qırımtatar Milliy Meclisiniñ azasıdır... Yüksel qırımtatar tili ve medeniyetiniñ ğayrıdan yaşamasına hızmet etken cemaat erbaplarından biridir, bir çoq gumanitar, şu cümleden Qırımda Türkiyedeki qırımtatarlar diasporasınıñ qol tutuvınen keçirilgen bala ve gençler leyhalarınıñ teşebbüsçisi ve reberidir. Qırımtatar Milliy Meclis reisiniñ Türkiye boyunca mesleatçısıdır», – dep bildirdi Çubarov.
Onıñ aytqanına köre, İsmet Yüksel kiriş yazağını imzalamadı. Vesiqa onıñ qoluna berilmedi.
Al-azırda İsmet Yüksel ailesinen beraber Qırım ile memuriy sıñırğa yaqın olğan Herson vilâyetiniñ mesken yerleriniñ birinde toqtaldı.
İsmet Yüksel Qırımdaki QHA agentliginiñ esasçısı ola. Onıñ apayı Gayana Yüksel Qırım Haber Agentliginiñ (QHA) baş muarriri ve Qırımtatar Milliy Meclis azası ola.
Hatırlatamız, iyülniñ 5-de Geniçeskte olıp keçken Meclis toplaşuvından keri qaytqan Qırımtatar Milliy Meclisiniñ reisi Refat Çubarovnı Qırımğa kirsetmediler. Qırım prokurorı Natalya Poklonskaya oña ekstremistik faaliyeti aqqında tenbiyelevni seslendirdi. Ondan soñ oña 5 yıllıq kiriş yasağını tuttırdılar.
Ukraina Tışqı işler nazirligi Qırım akimiyetini ceza aqqında tenbiyeledi. Ukraina ombudsmeni Valeriya Lutkovskaya dedi ki, Rusiye akimiyeti Çubarovğa Qırımğa kelmekni yasaq etip, kendi qanunlarını boza.
Bundan evel aynı yasaq Mustafa Cemilevge qarşı kirsetildi.
