Aqmescit – Bu sene Bağçasaray civarında Qırımda birinci sanayı parkı meydanğa ketirile bile. Bunı, yerli akimiyet vade ete. Qırımnıñ bu regionını nezaret altına alğan Tatarstan Cumhuriyeti vekilleri leyhanıñ ömürge keçirilüvinde yardım köstereceklerini ayttılar. Meclis azaları ise, kün evelden neticeler çıqarmamaq ve vadeler saylavlar arfesinde berilgeni aqqında unutmamağa tevsiye eteler.
Bağçasaray meri Konstantin Rubanenko Qırım.Aqiqatqa bergen izaatında, Bağçasarayda sanayı parkı Tatarstan ile birlikte qurulacağını bildirdi.
«Territoriyamızda belli bir bölük olacaq, o, yatırımcılar, donatmalarnı satqanlar, istisalcılarnıñ diqqatını celp etecektir», – dep qayd etti o.
«Biz 23 yıl devamında sahte mustaqillik içinde yaşadıq. Qırımnıñ imkânları, toprağı, suvı, avası, agrar-sanayı saası inkişaf ettirilmey aksine, çöke edi», – dedi Rubanenko.
Mühbirlerge aytqanı kibi, sanayı parknıñ qurucılığında Moskvalı yatırımcılarnıñ da iştiragi közde tutula.
«Men endi Tatarstannı qasevet etem», – Ahtem Çiygoz
«Tatarstan-Krım» ticaret eviniñ müdiri Vladimir Slesarev şunı bildirdi: «Biz endi yataqhane içün yer belgiledik, quracaqmız, mütehassıslarnı alıp ketirecekmiz».
«Tatarstan yardımğa azır. Amma, yardım degende, çoqusı allarda paranı tüşüneler, faqat, ğaye ve tecribe paylaşuvı bazıda paradan daa qıymetli ola. Onıñ içün, em ticaret adamları kelir, em de biz şahsiy-devlet işbirlikni nasıl etip teşkil etmege bilemiz», – dep bildirdi Slesarev.
Amma, parknıñ qurucılığınen bağlı topraq ayıruv meselesi tura. «Onı yarın çezip olsalar, biz kelecek künü inşaatnı başlar edik», – dedi Slesarev.
Meclis reisi muavini Ahtem Çiygoznınh fikirince, sanayı parkı region içün kerekli bir leyha, amma şimdiki vaziyette onı meydanğa ketirmek küç olacaq.
«Men endi Tatarstannı qasvet etem, belki de olarnıñ niyetleri eyidir, amma üç yıldan ziyade mer vaziyefesinde bulunğan şahısnıñ bir de bi rleyhanı ömürge keçirgenini körmedik. Onıñ adı er vaqıt dava ile belli ola. Saylavlar arfesinde belli bir imtiyazlar qazanacaq ola. Amma, erp bir Devlet şurasına keçip olamaz, çünki anda «Yedinaya Rossiya» vekili bar ve er şey endi belli», – dedi Çiygoz Qırım.Aqiqatqa.
Aytqanına köre, sanayı parkı leyhası bir qaç yıl evelsi işlep çıqarılğan edi. Bunda evel, bu kibi parklarnıñ Qırımnıñ çeşit şeerlerinde inşaatı boyunca mahsus programma da bar edi, onıñnen Avropa birligi ve BMT İnkişaf Programması meraqlana ediler. O vaqıt Bağçasarayda bu leyhanıñ teşebbüsçisi rayon devlet memuriyeti edi.
«Bir sıra teklifler, bu cümleden Türkiyeden de kelgen edi, amma soñki vaqıtları bu yöñelişte Rubanenko çalışmağa istegenini eşitemiz», – dedi Çiygoz.
Meclisniñ bu leyhada iştirak etüvi aqqında sualge Meclis reisi muavini şunı qayd etti: «Biz Meclis olaraq, Qırım içün kerekli olğan er türlü leyhağa qol tuta edik. Tatarstan bu mesele boyunca bizge muracaat etmedi, ricada bulunsa, biz elbette destek kösterecekmiz».
Qırım işğal etilgen soñ, Tatarstan Cumhuriyeti Bağçasaray ve Bağçasaray civarındaki iqtisadiyat ve köy hocalığı saalarını öz nezareti astına alğanı belli oldı. Tatarstan vekilleri Meclis azalarınen muzakereler alıp bara ediler, cumhuriyet prezidenti Rustam Minnihanov mart ayında olıp keçken Qurultayda iştirak etti.
