Aqmescit – Mart ayında meydanğa ketirilgen «Qırım birligi» teşkilâtı bütün qırımtatar cemaat teşkilâtlarını birleştirecek ola. Belli bir yeñişlerge endi irişti. Böyleliknen, «Namus» ve «Milli firka»nı «qoştı». Em de, Rusiye yaqlı olğanı aqqında defalarca beyan etkenlerine baqmadan, ekinci taraftan cevap alıp olamadı.
Keçenlerde Aqmescitte ötkerilgen matbuat-konferentsiyasında üç cemaat teşkilâtı - «Namus», «Qırım birligi» ve «Milli firka» birleşip, akimiyet ile işbirlik quracaqlarını bildirdiler.
«Namus» qırımtatar aqsaqalları teşkilâtınıñ idare reisi Temur Çelebiyev işbirlikniñ kerekliginde emin. «Bizim fikirimizce, dialog qurmaq kerek, iştirak etmek kerek, halqnıñ meselelerni bu kibi insanlarnıñ yardımınen çezmek kerek», - dedi o.
«Milli Firka» teşkilâtı reisi Enver Ümerovnıñ bildirgenne köre, qırımtatarlar arasında akimiyette vazife almaq içün lâyıq adamlar bar.
«Zanımızca, qırımtatarlar arasında aliy tasilli, itibarlı, tecribeli, cemiyet ögünde turğan meselelerni doğru çezgen adamlar çoq», - dedi o.
«Qırım birligi» regional cemaat teşkilâtınıñ reberi Sеytumer Nimetullayev, mart ayında Rusiye prezidentinen körüşüvinden qalğan teessuratlarnen paylaştı. «Anda olarğa aytıldı: qırımtatarlar birleşiñiz, barışıq ve dostluq içinde yaşamamıznı ister iseñiz, Rusiye Federatsiyası sizlerge eyi yaşamaq içün er şey yapar».
«Yedinaya Rossiya» saylav cedveli tizilgende añlaşmalar bozuldı
«Qırım birligi» saylav ştabınıñ reberi Reşat Kеnja Qırım.Aqiqatqa bildirgeni kibi, teşkilâtnıñ saylav cedvelleri em, çoqmandatlı, em majoritar bölükleri boyunca bütün akimiyet organlarına azır.
Aynı zamanda, ayırı qırımtatarlarnıñ «Yedinaya Rossiya» saylav cedvellerinde peyda olğanından çorlandı.
«Üç qırımtatarı bilmem kimni temsil eteler. Remzi İlyasov – Meclis ya da Meclisni degil...Kim olarnı namzet olıp kösterdi? «Yedinaya Rossiya» saylav cedvelini nasıl etip ettiler, çünki evelden beraber iştirak etecegimiz aqqında söylengen edi. Olar, cedvelni tertip etkende, bizni körmemezlikke urdılar. Şimdi bunı al etecekmiz…», - dedi o.
Halqnıñ añında satqınlar qala, - Ahtem Çiygoz
Meclis reisi muavini Ahtem Çiygoz Qırım.Aqiqatqa vaziyetni izaatladı. «Olarnıñ akimiyetke yaltaqlanıp barğanları, netice ketirmeycegi belli edi», - dedi o.
«Yedinaya Rossiya» saylav cedvelinde bir qaç qırımtatar soy adı peyda olacağını tahmin ete edim. Faqat, evelden eñ azı 15 olacağını ayta ediler. Amma, bu imkânsız olğanı birden añlaşıla edi», - qayd etti Çiygoz.
Aytqanı kibi, akimiyet dialog quracaq olsa edi, «halq arasında ürmet etilmegen marginal grupplarnı meydağa ketirmeden, halq özü saylağan milliy idare organı – Meсlisni saylar edi».
Çiygoz hatırlatqanı kibi, evelden de, «Meclisniñ tekliflerini közge almay» bu kibi qurumlar teşkil etilgen edi - «prezident yanında qırımtatarlar vekillerniñ nasıldır şurası».
«Olar ğayıp oldılar. Amma, halqnıñ añında satqınlar qala», - dep qoştı Çiygoz.
Hatırlatamız, evelden Yaqın şarq taqiqatları Merkeziniñ reberi İgor Semivolos Qırım.Aqiqatqa bergen izaatında, «Milli Firka», Qurultay-Meclis ve akimiyet arasında olğan davanı qullanıp, «otuz rublege» satılacaq olğanını aytqan edi.
Semivolos Meclisniñ raqipleri iç bir şeyge irişip olamaycaqlarını ayttı. «Olar iç bir şeyge irişip olamaycaqlar. Bu Çeçenistan degil, ruslar telükesizlik içün para bermeyler. Bu kibi şerikler ruslarğa kerek degil», - dedi o.
Qırımnıñ «Devlet şurasına» saylavlar sentâbrniñ 14 –nde keçilecek. Onıñ terkibine 50 adam saylav cedvellerine köre, ve 25 vekil - bir mandatlı majoritar bölükleri boyunca saylanacaqlar.
