Link açıqlığı

Çubarov: zorbalıq, zıddiyet ve qorqu bizim evimizge atılıp kirgenlernen birlikte eñ yaqın vaqıtta yoq olurlar


Rusiye akimiyeti tarafından yarımadağa kelmege yasaq etilgen Meclis reisi Refat Çubarov, Qırım musulmanlarnı Oraza bayramınen hayırlap, eñ yaqın kelecekte işğal etilgen yarımada zorbalıqtan ve insan degerliklerni aşalağan şahıslardan azat olunacağını bildirdi.

Bunı o, «Facebook» saifesinde yazdı.

«İşğal etilgen Qırım akimiyetine ait zorbalıq, zıddiyet ve qorqu evimizge atılıp kirgen ve insan degerliklerini aşalağan nizamnı qurğan şahıslarnen birlikte eñ yaqın vaqıtta Qırım toprağından yoq olacağında iç şübe yoq», – dep yazdı Çubarov.

Aynı zаmanda, Meclis reisi, «ruh cietinden zayıf olıp, qırımtatar halqı Qurultayı ve Meclisniñ yüzünde milletke qarşı çıqqanlar» da bunı unutmasınlar, dep qayd etti.

Hayırlav bildirmesinde Çubarov, qırımtatarlar bu muqaddes bayramnı yarımadada qalabalıq olğan vaziyette qayd etmege mecbur olğanlarından çorlandı.

«Daa bir qaç ay evelsi bayram namazınen yekünlengen Ramazan ayını Qırım musulmanları qasevet ile tolu şaraitlerde qayd eteceklerini iç tüşünmegen ediler. Em de, Qırım – Vatanımız, Rusiye ile Ukraina arasında dostluqnıñ ve barışıqnıñ tarafdarları olaraq bilingen devlet reberleri tarafından zapt etilecegini iç bir kimse beklemedi. Yani, şu reberlerniñ aytqanları episi yalan ve sahte olğanını kördik», – dep yazdı Meclis reisi.

Çubarov emin, felekniñ çemberinden keçken, ğurbetlikten soñ, öz toprağına avdet etken qırımtatar halqı bu sınavdan da keçer.

«Qırımnıñ bütün musulmanlarını Oraza bayramınen hayırlayım! Allah Taalâ er musulman qorantasına, qomşu ve dostlarına rahmet ve merhamet eylesin!», – qayd etti Meclis reisi.

Bazar ertesi, iyül 28-nden başlap, mülsulmanlar Oraza bayramını qayd eteler. Bayram tedbirleri adetince 3 kün devam ete.

XS
SM
MD
LG