Odessa kinofestivalinde ukrainli Оles Saninniñ «Povodır» filmi numayış etildi. Filmde baş rollerden birini qırımtatar yırcısı Camala icra ete.
Taqdim merasiminden evel, Camala Facebook saifesinde böyle yazdı: «Ayatımnıñ müim bir künüdir. Seyirciler ögünde Оles Saninniñ «Povodır» filminde dramatik aktrisa kibi çıqışta bulunacağım. Filmniñ taqdiri içün qasevet etem, seyircidelerniñ onı sevgenini ve añlağanını isteyim. Qaramanım Оlga – yaş qız, ayatında da rolni oynağan bir aktrisa. O, ya tüşüncesiz bir komsomol, aşq olğan qızçıq, ya Kleopatra kibi esapkâr, aqıllı, talapkâr ola bile edi. Er ceetten, o, apansızdan yırtıla bilecek ince yıp boyunca ketkenini er vaqıt bile ve añlay edi».
Odessa halqara kinofestivaliniñ matbuat hızmeti bergen malümatına köre, filmde kösterilgen vaqialar 1930 seneleriniñ başında Sovet Ukrainada olıp keçe. Süjetniñ negizinde – amerikalı oğlan Piter Şemroknıñ ve soqur çalğıcı İvan Kоçerganıñ dramatik seyaahatı tura. Olar kollektivizatsiya ve açlıq vaqtında körüştiler ve 1934 senesi İvan Kоçerganı Harkov civarında atıp öldürgende vedalaştılar.
Kör çalğıcınıñ yoldaşını küçük ukrainalı Anton Grin oynadı. Bundan da ğayrı, filmde tahminen 200 kör aktör oynadı, olardan çoqusı – çalğıcı.
Film büceti – 16 million grivna. «Çoq degil», – deyler prodüserler, amma buña da memnünler. Vasta sıñırlı olğanı sebebinden büyük donatmalarnı yapmağa imkân olmadı, çıqaruvlar tabiatta keçirildi. Kerek manzaralarnı tapmaq içün bütün Ukrainanı boylap kezmege kerek oldı. Çıqaruvlar, emindir Оles Sanin, dünya kinematografistlerini ayrette qaldırır.
İlk sefer Ukrainada filmni kör seyirciler içün numayış eteler, mahsus tehnologiya işletilip, ekranda olıp keçken vaqilarnı añlatacaqtır.
