Rusiye matbuat vastaları kene de Ukraina ile Avropa arassındaki munasebetlerni kerginleştirmege tırışalar. Bu sefer, ukrainlilerni Poloniya tarafından mahkeme şikâyetleri ile qorquzalar. Aynı zamanda, rusiyeli internet qaynağı, Rusiye prezidenti Vladimir Putinniñ siyasetine qol tutqan Valeriya yırcısınen birlikte çıqışta bulunmaq istegi sebebinden ukrain yırcısı Oleg Skripkanı Ukrainanıñ mahsus hızmetleri taqip eteler, dep bildirdi.
«Rossiya-24» Rusiye devlet kanalı seyircilerine, Ukraina Avropa Şurasınen assotsiyaatsiya aqqında añlaşmanı tizgen soñ, tüşecek «nevbetteki qapqanı» aqqında ikâye etti.
Haberler alıp barıcısı şunı bildirdi: «Restitutsiya (eski aqlarınıñ tiklenüvi) aqqında söz yürütile. Galiçina topraqlarına, misal içün endi çoqtan 80 biñ poloniyalı iddia etmekte. Mahkeme işleri de çoqtan yutturıldı, tek kerekli qanunlarnıñ qabul etilüvi beklenile. Em de, ukrainlilerniñ topraqnen paylaşuvını istegen daa çoq kimseler bar».
Faqat, PAUCI ukrain-poloniyalı işbirlikniñ Fondu müdiri Yan Pyeklo Радіо Свобода-ğa bildirgeni kibi, bu malümat rusiyeli matbuat vastalarınıñ nevbetteki uydurmasıdır. Onıñ fikirince, rusiyeli matbuat vastaları ğarbiy ukrainliler ve poloniyalılarnıñ qavğa etmelerini isteyler.
«Men, restitutsiya meselesini kerçek dep bellemeyim. Eñ esası, ukrain-poloniyalı munasebetlerniñ kerginleşüvi içün bir sebep tapmaqtır. Bu vaziyet boyunca yekâne izaatım – bunıñ episi uydurmadır», – dep qayd etti Pyeklo.
Aytqanına köre, Poloniya, Ukraina ve ya Aqrusiyede mal-mülkü qalğan vatandaşlarına endi çoqtan tazminat berdi. «Ekinci kere tazminatnı elde etmek ğayet küçtir», - dep añlattı Pyeklo.
«Ukrain mahsus hızmetleri Skripkanı Valeriya sebebinden qorquza»
«VV» taqımınıñ yetekçisi Оleg Skripka, ukraina mahsus hızmetleriniñ qorquzuvları sebebinden, rusiyeli yırcı Valeriya ile birlikte Londrada yırlamağa red etti. Bu malümatnı Super rusiyeli internet qaynağı neşir etti.
Kontsert oktâbr ayında Londranıñ Royal Albert Hall-da keçirilecek. Amma, qoruyıcı organlarınıñ basqısından Skripka bu tedbirde iştiraketmege red etti. Bunı internet – neşirine Valeriyanıñ aqayı ve prodüseri İosif Prigojin bildirdi.
«Men Skripkanen laqırdı ettim, o maña Ukraina havfsızlıq hızmeti onı soravğa çağırtıp, rusiyeli yırcınen beraber yırlasa onı apis cezası bekley, dep qorqızdılar», – añlattı Prigojin.
Bunen beraber, bu malümatnı aydınlatqanı yırcığa zarar ketirmez dep, ümüt besledi.
Faqat, Skripka YouTube-ta mühlislerine muracaatını yerleştirip, kontserte iştirak etmeyceginiñ diger sebeplerini bildirdi.
«Suzivkı»de bulunğan ürmetli mühlislerim, men ne qırımğa, ne de Londrağa Vаleriyanen yırlamağa barmaycam. Men Ukrainağa qol tutam. Ukrainanıñ bütünligini destekleyim. Ve «Suzіvka»ğa ukrain yırlarını icra etmek içün yol alam. Yaşasın Ukraina», - dedi Skripka. Em de şimdiki vakıtta informatsion cenk ketkeni, o da yalanlarnıñ qurbanı olmağa boldurğanın ilâve etti.
