Link açıqlığı

Cemilevniñ adliyecisi: Rusiyeniñ Qırımğa nisbeten munasebeti beterleşecek


Ukraina halq vekili, milliy lider Mustafa Cemilevniñ rusiyeli adliyecisi Mark Feyginniñ fikirince, Rusiye Qırımğa daa qattı olacaq.

Bunı o UNİAN haber merkezine bergen intervyüsında bildirdi.

«Tatarlarnı tolusınen boysundırmağa tırışacaqlar, muhtariyetniñ bir de bir unsurını bile tüşünmesinler. Em de ukrain tilinde laqırdı etmek meselesi ve milliy mekteplerniñ saqlap qalmasınen problemler çıqacaq. İş adamları mülkniñ çekip aluvına azır olmalılar. Topraq ve mal-mülkniñ zapt etüvi de yüz berecektir…», - dedi o.

Feygin emin, bu vaziyette adliyecilerge bağlı olacaq. Rusiyeli adliyeciler, qırımlılarğa yardım etmege mecbur, dep qayd etti Feygin.

«Cemilevniñ işi – meseleniñ tek ücüdir. Eyi ki, o apishanede oturmay, onı cinayetlerde qabaatlamaylar…Aynı zamanda, ukrainliler tarafıdan bir sıra muracaatlar kelip başladı, adamlarnı yaqalap Rusiyege alıp kete ekenler. Tek Qırımda degil, Ukrainanıñ şarqında da bu kibi adiseler yüz bere. Olar adliyeviy yardım almasar, kerçekten de havflı bir vaziyette qalırlar. Belli bir sebeplerden soy adlarnı aytıp olamam. Amma, bir qaç iş er keske malü olğan Оleg Sentsovnıñ işine oşay», – dedi advokat.

Bunen beraber o, ileride de, Rusiye apishaneleride ukrainlilerniñ sayısı artmasını tahmin ete.

Ukrainli rejissör Оleg Sentsovnı mayıs 11 künü qoruyıcı organlar hadimleri yaqaladılar. Soñra, onı Moskvağa alıp ketkenleri belli oldı. İyül 7 künü Moskvanıñ Lefort mahkemesi onı oktâbr ayına qadar apiste bulunmasını belgiledi.

Qırım işğal etilgen soñ, Qırım yarımadasında qırımtatar cemaatçılığını da sıqıştırp başladılar, milliy tedbirlerni merkezde keçirmege izin bermeyler ve narazılıqlarnı ekstremizm kibi tanıylar. Bunen beraber, milliy lider Mustafa Cemilev ve Meclis reisi Refat Çubarovğa yarımadağa kelmege yasaq ettiler.

XS
SM
MD
LG