Qırımtatarlarnıñ liderleri – Mustafa Cemilev ve Qırımtatar Milliy Meclisiniñ reisi Refat Çubarovnıñ – Qırımğa kiriş yasağı millet mensüpligine köre ayırımdır. Bunı Kiyevdeki matbuat konferentsiyasında ükümette etnik milliy siyaset meseleleri boyunca vekâletli Gennadiy Druzenko bildirdi.
«Men buña eki qatlıq ayırım dep aytar edim, çünki bu adamlar yalıñız qırımtatarlar olğanını köstermeyler, olar qırımtatar halqınıñ ekseriyet sesini ifadeleyler», – dep ayttı Druzenko.
Onıñ fikirince, Çubarovnıñ Qırımğa kiriş yasağı Qırımdaki vaziyet daa beter olğanını isbatlay. Onıñ qayd etkenine köre, bunıñ kibi ayırım insan aqları boyunca beyanname ve bir sıra diger halqara vesiqalarnen yasaq etilgen, olarğa em Ukraina, em de Qırımnı işğal etken Rusiye riayet etmeliler.
«Böyleliknen, köremiz ki, Moskva tarafından nezaret etilgen işğal akimiyeti, olarnıñ fikirince, yarımadada çalışmağan yalıñız Ukraina qanunlarını degil de, em Qırım akimiyeti, em de Moskva akimiyeti laflarda tanığan şartlarnı boza», – dep ayttı Druzenko.
Onıñ qayd etkenine köre, Çubarov Qırım «parlamentiniñ» azası olıp qala, demek, onıñ saylayıcılarını bu organda resmiy vekilsiz qaldırdılar.
Bundan evel bildirilgeni kibi, Geniçsekten qaytqan Meclis reisi Refat Çubarovnı Qırımğa kirsetmediler. Oña Rusiyege 5 yıl devamında kelmege yasaq etildi.
Ukraina tış işler nazirligi bunıñ kibi areketlerni takbih etti.
Qırım «baş naziri» Sergey Aksönov jurnalistlerge bergen malümatqa köre, Çubarovnıñ yarımadağa kiriş yasağı «onıñ Qırımda milletlerara zıddiyet olması içün faaliyetinen» bağlı.
Sürgünlik künü arfesinde aynı böyle yasaq qırımtatarlarnıñ milliy lideri Mustafa Cemilevge berildi.
