Link açıqlığı

Aqmescit – Mecliste, Refat Çubarovnıñ yarımadağa yiiberilmemesi ve atta apiske alınması mümkünligi aqqında bilgenlerini aytalar. Bunıñ episi, «Devlet şurasına» 2014 senesi sentâbr 14 künü ötkerilecek saylavlarnı boykot etmek qararı sebebinden yapılğandır, dep belleyler. Temsiliy organ reissiz çalışa bilecekmi? Ve soñki vaqialar qırımtatarlar ile rusiyeli akimiyet arasında munasebetlerge nasıl tesir etecek? Bu kibi meselelerni Qırım.Aqiqat saytına Meclis reisi muavini Nariman Celâl izaatladı.

Çubarovğa Qırımğa kelmek yasağı, ne qadar ilân etilse de, çoqqa sürmez, - dey Nariman Celâl. Meclis işini toqtatmaycağına baqmadan, bu yasaqlav onıñ faaliyetine ciddiy tesir etecektir.

«Refat Çubarov, menimce, bir küç olıp, akimiyetke qararlarnı qabul etmege bermey edi. Bir taraftan, o, qırımtatarlarnıñ aqlarını qorçalamaq içün añlaşma yollarını bulmaq kerekligini añlay, diger taraftan ise, milliy areketniñ devamcısı olaraq milliy davanıñ esaslarını yahşı bile. Bu noqtai nazardan, onıñ Qırımda bulunmaması pek yaramay. Amma, zemaneviy tehnikiy usullar bağ tutmağa yardım ete, misal içün Skype vastasınen o Meclisniñ toplaşuvlarında iştirak etip olur»,– dey Nariman Celâl.

Refat Çubarov
Refat Çubarov

Meclis ufqiy bir qurum olğanı sebebinden, reissiz de çalışa bilecegini tahmin etmek mümkün. Meselâ, yerli meclisler o qadar mustaqil oldılar ki, atta bazıda, Merkeziy Meclisniñ qararlarına baqmay, faaliyetlerini alıp baralar.

«Biz iç bir vaqıt bir ya da eki adamnıñ fikirine tayanıp areket etmey edik. Bu yañlış bir fikir. Mustafa Cemilevni ürmet eterek, kendi fikirimizde soñunace tura edik. Qararlar tek demokratik usulda qabul etile edi. Ve Meclis azaları daima özleri tüşünip, özleri mesüliet çeke ediler», – qayd etti Nariman Celâl.

Çubarovnıñ Qırımğa kelmek yasağı sebebinden adiy qırımtatarlar arasında narazılıq dalğası köterildi. Nariman Celâlnıñ sözlerine binaen, iyül 7-8 künlri Meclisniñ soñki vaqialarnen bağlı resmiy beyannameleri çıqacaqtır.

Nariman Celâl
Nariman Celâl

«Biz qırımtatarlarnñ menfaatlarını közge alaraq, «akimiyet» ile añlaşmağa tırıştıq. Fakaat, bu işbirlikniñ maiyetini bam-başqa köre ekenmiz. Qorqu yoq. Qanun boyunca faaliyet etecekmiz, Meclis azalarından iç birine zarar kelmesin. Amma, menim ve bazı işdeşleriminiñ fikirince, bunıñnen akimiyet sıñırlanmaycaq. Ya da umumen Meclis, ya da ayırı şahıslarnıñ siyasiy faaliyetini toqtatmaq içün basqı yapılacaqtır», – kayd etti Nariman Celâl.

Hatırlatamız, iyül 5 künü, Herson vilâyeti Geniçesk qasabsında toplaşuvnı keçirgen Meclis reisi Refat Çubarovnı akimiyet yarımadağa yibermedi. Oña 5 yıl devamında Rusiyege, ve bu cümleden Qırımğa kelmekni yasaq ettiler.

İnsan aqları boyunca Ukraina Yuqarı Radasınıñ vekili Valeriya lutkovskayanıñ fikirince, Meclis reisine Qırımğa kelmege yasağı BMT ve Rusiye Federatsiyası qanunlarını boza. Rusiyeniñ bu kibi areketlerini o «etnik cietinden aşalav» kibi adlandırdı. Ukraina tış işler nazirligi, Çubarovğa Qırımğa kelmek yasaqnı «Kreml işğaliniñ qabaatlavı» olaraq tanıdı.

XS
SM
MD
LG