Aqmescit – Yarımadanıñ büyük şeerlerinde soñki bir qaç ay devamında tibbiy sigortalar berile. Onıñ saibi tibbiy müessiselerniñ hızmetinen bedava qullana bile. Sigortanı elde etmege istegenlerniñ sayısı çoq olğanı içün büyük nevbetler tizile.
Aqmescitniñ Karl Marks soqağındaki sigortalarnıñ berüv merkezi bir ay devamında çalışmaqta. Er kün mında yüzlernen adamlar toplaşa. Sigortanı almaq içün, Rusiye pasportı ve olsa, şahsiy esapnıñ sigorta nomerini (SNİLS) teslim etmeli.
Kelgenlerni evelden tertip etilgen cedveller boyunca qabul eteler. Nevbetni bir aftağa tizeler. Qırım sigorta tibbiyet şirketi künde orta esapnen 400 adamğa vesiqanı berip yetiştire. Bazı sakinler saatlernen nevbette turmağa mecbur olğanından çorlanalar.
Nefaqacı Valeriy Nikolayeviç Qrım.Aqiqatqa şikâyet etti: «Men saba saat 8-de keldim. Mında endi adamlar tura edim, 320 nci olıp yazıldım. Saba saat 9-da adamlarnı qabul etip başladılar. Şimdi endi saat 15-30, iş kününiñ soñuna qadar kirip olurım, dep ümüt etem».
Nevbette turğanlarnıñ ekseriyeti – ihtiyar yaşındaki sakinler. Sigortanı alıp, tibbiy müessise ve hastahanelerde bedava tedaviylenecegine ümüt besleyler. Aynı zamanda Qırımda sigorta tolusınen 2015 senesi yanvar 1 kününden başlap çalışacaq. Şimdiki vaqıtta ise, tibbiy müessisede vesiqa işke tüşürildimi, dep soramaq kerek.
Aqmescitte mecburiy tibbiyet sigortasınıñ berüv merkeziniñ yolbaşçısı Darya Kovılinanıñ malümatına köre, başından sakinlerge 30 künlik sigorta berile. «Bu müddet içinde Moskvada daimiy sürette çalışacaq sigortalar yapıla. Soñra, müşterige üstünde gologramması olğan sigortanı teslim etemiz», - dep añlattı Kovılina.
Aytqanına köre, çalışıp olğanlar tibbiy sigortasını almalılar çünki onsız resmiy olaraq işke almaylar.
Bu kibi merkezler Aqyar, Keriç, Kezlev ve Sudaqta çalışalar. Amma, anda da büyük nevbetler tizile. Darya Kovılina aytqanı kibi, şirket nevbetlerni qısqartmaq içün qolundan kelgenini yapa. Amma, nevbetler ep bir azalmay.
