Cuma künü, iyülniñ 4-nde Meclis Qırımdan tış – Herson viyaletinde toplaşuvnı keçirecek.
Bundan evel, Herson regional Meclisiniñ reisi Asan Aliyev Qırım.Aqiqatqa bildirgeni kibi, toplaşuv Geniçeskte keçirilecektir.
Kün evelsi, Meclis kâtibiyeti toplaşuvda muzakere etilecek meseleler cedvelini aydınlattı. Tedbirde, esas eki – mart 29 künü 2014 senesi VI-ncı çağıruvnıñ Qurultay azaları qabul etken «Qırımtatarlarnıñ Vatanda öz kelecegini belgilemek aqqı» qararnıñ yerine ketirilüv ketişatı ve nevbetteki Qurultaynıñ ötkerilüv tarihı ve meseleleri baqılacaq.
İyül 4-5 künleri arasında ötkerilecek Meclis toplaşuvında, tahminen 60 azanıñ, bu cümleden Ukraina halq vekili Mustafa Cemilevniñ iştiragi közde tutula.
Meclis reisi muavini Nariman Celâl, ZN.ua. neşirine bildirgeni kibi, Qırımda qırımtatarlarnıñ al-vaziyeti ve umumen Ukrainadaki vaziyet talil etilecektir. Em de Cemilevniñ çıqışı da belgilendi.
«Mustafa Cemilev bugün de bugün qırımtatar ve Ukrainanıñ aqlarını qorçalamaq içün halqara seviyede keñiş faaliyet alıp bara. O, malümatnen paylaşıp, ileride yapılacaq adımlar muzakere etilecek. Qurultaynen bağlı ekinci mesele buña bağışlanacaq. Onıñ zaruriyeti ve baqılacaq meseleleri», – dep qayd etti reis muavini.
Bundan da ğayrı, sentâbr 14 künü «Qırım Cumhuriyeti Devlet Şurasına» ötkerilecek saylavlarda qırımtatarlarnıñ iştiragi mevzusı köterilmesi mümkünligi qayd etti.
