«Voplі Vіdoplâsova» taqımınıñ yetekçisi Оleg Skripka özüniñ yazlıq evinde qırımtatar qorantasını yerleştirdi. Bunı «Vesti» neişiri bildire.
«Bu qırımtatar qorantası – ana-babanen dört bala. Men olarnen köçkenlerge yardım etken Krım-SOS saytı vastasınen tanış oldım. Men qırımtatarlarnen «KraÏna mriy» festivali sayesinde işbirlik tutam, tedbir çerçivesinde ayırıca qırımtatar sanası qurulacaq, anda icadiy taqımlar icra etecekler», — dep añlattı Skripka.
Neşirniñ malümatına köre, Skripkanıñ yazlıq evi Kiyev deñizi yalısında yerleşe. Yırcı onı bir qaç yıl devamında qurmaqta. 30 sotka topraq damartasında büyük bostan, bağça, üç qatlı ev, amam ve garaj bar.
Оleg Skripka apayı ve dört balasınen Kiyevde yaşay.
Ukraina içtimaiy siyaseti nazirliginiñ malümatına köre, Qırımnı endi 25 biñ insan terk etti. Ekseriyeti Vinnitsa, Lvov, Kiyev vilâyetlerine köçtiler.
