Link açıqlığı

Aqmescit – İyün 27 künü yarımadadaki «baş rus neşiri» «Krımskaya pravda»nıñ çıqqan nushasınıñ baş saifesinde «İş bar! Rusiyeniñ regionlarında. Moskva civarındaki prezident yazlıq evinden başlap Kamçatkanıñ limanlarına qadar» serlevalı maqale derc etildi.

Gazeta şunı bildire, «Qırım Cumhuriyeti sigorta aluvı boyunca mecbur olğan fondunıñ bölüklerinde işsizlik vaziyette Rusiye Federatsiyasında talap etilgen zenaatlar bazasına kirmek mümkün. Qırımlılar Rusiyeniñ çeşit köşelerinde yerleşken işhanelerde federal parasına işlep sınav müddetini keçire bileler».

Künlerde Aqmescitte tamam şu Fondnıñ reberi Sergey Brodovskiy matbuat-konferentsiyasını keçirip, qırımlılarnı evlerni terk etip, Rusiyede para qazanmağa çağırdı.

«Rusiyeniñ çeşit köşelerinde işçiler talap etile, - qayd etti Sergey Brodovskiy. – Moskva civarındaki Rusiye Federatsiyası Prezidentiniñ işleri boyunca idaresiniñ nezareti altında bulunğan «Snegiri» şifahanesinden başlap, balıqçı, deñizci, kapitan ve diger deñiz zenaatları talap etilgen Kamçatkağa qadar iş yerleri bar. Aylıqlar 20 biñden başlap, 120 biñ rublege qadar yete bileler. Eki biñ iş yeri Tatarstanda mevcut. Yaşamaq içün meskenler de ayırıla».

Qayd etilgeni kibi, daa çoq ünerli işçiler davet etile: bu cümleden, qurucılar, elektrikacılar ve ilâhre. Berilgen malümatqa köre, qırımlılar sınav müddetini federal qaznasından alınğan parağa keçe bileler, olarğa minimal aylıq berilip, yol masrafları qapatılacaq. İşsizlerni ise, ticariy işlernen oğraşmağa teşviq etecekler.

«İşsiz vatandaş ticariy işlernen oğraşmağa istese, ve biznes planını qorçalasa, oña bir kerelik yardım kösterilecek ve 58,8 biñ ruble miqdarında işini başlamaq içün para», – dedi Sergey Brodovskiy.

Rusiyeli teşviqatçılar endi işçilerni de tapqanları belli oldı. Brodovskiyniñ sözlerine köre, Qırım boyunca çeşit işhanelerde çalışqan 12 biñ qırımlı endi cedvelge alındı, olardan 8 biñi ileride iş vazifelerine qaytacaqlar.

«Bularnıñ ekseriyeti qoruyıcı organlarnıñ hadimleridir, olar ğayrıdan mütehassıs olğanlarını tasdiqlamaq kerekler. Tahminen 5 biñ adam şimdiki vaqıtta kendi esabına ya da ratlıq aldı, ya da yarım kün çalışa»,– dedi Brodovskiy. «Ukrainanıñ cenüp şarqından» kelgen qaçaqlarğa da Rusiyege iş qıdırmaq içün barmağa tevsiye etile..

Aynı zamanda, «Tsentr jurnalistskih rassledovaniy» mühbirler taqiqat merkezi bildirgenine köre, Qırım işğal etilgen soñ, yarımadanıñ iqtisadiyatı tüşük alğa keldi. Tamam şu Sergey Brodovskiy bildirgeni kibi, yarımadada iş tapmaq imkânsızdır ve Rusiye Federatsiyasınıñ diger bölgelerinen teñeştirilse, eñ yüksek işsizlik seviyesi Qırımda qayd etildi.

«Devlet Şurasınıñ» reisi Vladimir Konstantinov Moskvada «Qırımğa kelgen-ketken turistlerniñ sayısı yalıñız 11%-ğa azlaşqanını» bildirse de, kerçekten ise, 75 %-nı teşkil ete. Ve atta, resmiy malümatqa köre, 2014 senesiniñ iyün 9 kününe yarımadadaki şifhane ve yazlıq eveleri tek 37%-ğa tolu ediler.

Qırımnıñ sabıq turizm naziri Aleksandr Liyev aytqanı kibi, «Qırımnıñ raatlıq mevsimini atta adamlarnı ketirip qoysalar bile qurtarmazlar…». Ve bunı qabul etmeli: «Yüz biñ qoranta raatlıq mevsimi devamında qazanıp, keçineler. Men ise, nazirlikni terk etkende, acele yapılğan qararlardan saqınmağa çağırdım. Çünki bazıları, siyasiy bildirmeler yapalar, qırımlılar ise, qorantalarnı şu mevsimniñ neticelerine köre, baqalar». «Rusiyeliler de kütükler degiller. VVP-niñ emiri ile olarnı ketirip olamazsıñ. Olarğa Qırım ile bağlı bir çoq yalan da söylengen edi», - qayd etti sabıq nazir.

Aynı zamanda bazı malümatlarğa binaen, Feysbukta bloggerlerden biri şunı yazdı: «Rusiyede gizliden askerlerni toplaylar. Bir sıra şeerlerde rezervde bulunğanlarnı çağırtmağa başadılar. Böyleliknen, iyün 24 künü Petrozavodsk şeeriniñ sakinlerini çağırttılar. Rusiye resmiy olaraq bir kimsenen cenkleşmey. Onıñ içün mektüplerni alğanlar, olarnı Ukrainanıñ cenüp-Şarqına yollamaları mümkün, dep belleyler».

Onıñ içün de Rusiyege işke davet etilgen qırımlılarnı da, başta işke, soñra cebege yollay bileler.

Oleg Solovey, aqmescitli mühbir

«Fikir» rubrikasında bildirilgen tüşünceler müelliflerniñ noqtai nazarını bildirip, muarririyetnen aynı olmaması mümkün

XS
SM
MD
LG