Link açıqlığı

Qırımtatar halqınıñ yetekçisi, Ukraina halq vekili Mustafa Cemilev emin, Avropa Birligi Qırım meselesinde Rusiyege yol bermez.

Bunı o, mühbirler taqiqatı Merkezine telemarafon devamında bildirdi.

«Men Avropa Şurasınıñ baş kâtibi Torbyorn Yagland ile körüştim. Biz bir saat devamında işğal etilgen Qırımdaki vaziyetni muzakere ettik», – qayd etti Mustafa Cemilev.

Onıñ bildirgenine köre, Avropa parlamentiniñ deputatları olğan imkânlarını qullanıp, yarımadanıñ statusını qaytarmağa tırışacaqlar.

«Olar, bugünki künümizde bir de bir devletniñ digerini zapt etmesini bir sesnen takbih eteler, - dedi Mustafa ağa. – Kremlde er şey unutılacağına işanıp, Avropa da buña yol berecegini belleseler, yañlışalar», – qayd etti o.

Halq vekiliniñ fikirince, yarımada Ukrainağa qaytarılmağanca, Qırım sakinleriniñ eñ adiy ihtiyacları yerine ketirilmeycek.

«Ufaq-tüfek meseleler halqara teşkilâtlar ve insan aqları boyunca Avropa mahkemesinde çezilip, uzaqqa sürecek, onıñ içün yekâne çezüv yolu – Qırımnı Ukrainağa qaytarmalılar», – dep ayttı Mustafa Cemilev.

Em de bunıñ içün Rusiye öz istegini kösterip, hata yapqanını aytıp, Ukrainağa ketirgen zarar içün tazminat ödemeli.

«Diger yol ise, bu elbette Rusiyeni istilâcı siyasetten vazgeçmege mecbur etecek, oña qarşı qullanılğan yasaq tedbirler olması mümkün. Kreml yolbaşçıları hatırlamalılar, sovetler birligi Afğanistanğa ordularnı yollağan soñ qullanılğan yasaq tedbirleri bu devletni yoq etti. Biz Rusiye Federatsiyasınıñ dağılmasını istemez edik, biz bu devletniñ demokratik olması ve Ukraina ile eyi qomşulıq munasebetlerni devam ettirmesini arz etemiz», – dep qayd etti Cemilev.

Bundan da ğayrı, qırımtatarlarnıñ yetekçisi, Ukraina şarqındaki areketlerniñ toqtatılması Avropa ile Rusiyeniñ razılaşmasına ketirmez, dep belley.

«Bu mesele meni pek raatsızlay edi. Obama ile laqırdı etkende ve Avropalı qurumlarda muzakereler alıp barğanda, maña Qırım meselesi iç bir vaqıt unutılmaycağını ayttılar. Ve bu mesele Abhaziya ya da Dağlı Qarabah ile iç te teñeştirilmez, çünki Qırım başqasınıñ toprağı olıp ta, arsız şekilde işğal etildi. Onıñ içün bu noqtada razılaşma olmaz», – dedi Mustafa Cemilev.

İleride, Mustafa Cemilev Qırım boyunca muzakereler devam ettirilecegini tüşüne.

«Qırım meselesi kün tertibinde daimiy sürette turacaq, amma, Kreml yolbaşçılarnıñ istegi ve aqılları yetecekmi ya yoq, vatandaşlarnıñ menfaatlarını qoruycaqlarmı ya yoq belli degil. Şovinistik isteklerini degil de, Rusiyeniñ menfaatlarını köz ögüne alsalar, işğal etilgen topraqlarnı azat eterler. İşte, bataqlıq olacaqtır», – dedi Cemilev.

Onıñ sözlerine binaen, aksi alda, Qırımnıñ kelecegi yoqtır, çünki tış dünya ile olğan bütün bağlar üzülecek.

XS
SM
MD
LG