Link açıqlığı

Mustafa Çauş

Aqmescit – Qırımda iyün 26 künü qırımtatar Bayraq kününi qayd ettiler. Kün evelden teşkilâtçılar bayram tedbirleri qaysı yerde ötkerilecekgini bilmey ediler, çünki şeer «reberleri» resmiy ruhsetni bermeyip, vaqtnı soza edi. Neticede, bayram, evelden belgilengen kibi Aqmescitniñ merkezinde degil de, şeerniñ çetinde ötkerildi. Halq merasiminde avtozaklar ile rusiyeli politsiya bulundı, bayramğa qoşulmaq içün ise, kelgenler mahsus teşkerüvden keçmek kerek oldılar.

Saba Qırımda küçlü yağmur yağdı, bütün bayram tedbirleri az qaldı keçirilmey qalacaq edi. Üylede ava deñişti, Aqmescitniñ Balalar bağçasında birinci fleşmob teşkil etildi. Qırımtatarlarnı bayram ile, milliy kiyimler kiygen ana ve balalar keldiler, olarğa lâqayd qalmağan sakinler qoşuldılar.

Teşrif buyurğanlar arasında yerli bloger Böris Tatorin de bar edi. O qırımtatarlarğa qol tutmağa ve «iç bir yasaq ve sebepke baqmay, epimiz bir ve barışıqsever olğanını» tasdiqlamaq içün keldi.

Blogerniñ qolunda ukrain bayrağını körmek mümkün edi. «Çünki Qırım «Anayasasında» ve prezident Putinniñ emirinde qayd etilgeni kibi Qırımda üç devlet tili mevcut ve onıñ içün halqlarnıñ medeniyetleri de desteklenmeli», – dedi o.

Kün devamında Aqmescitniñ merkezinde milliy timsallernen bezetilgen urbalar kiygen yaşlarnı rast ketirmek mümkün edi. Yollarda ise, bayraqlarnen yaraştırılğan maşinalar yüre edi.

Amma, bu künü er şey tertipnen keçmedi. QHA bildirgeni kibi, Aqmescitte 5 erkek qırımtatar bayrağı olğan maşinağa ücüm ettiler. Vaqia Samokiş ile Sevastopolskaya soqaqları çatışmasında yüz berdi. Ücüm etkenler maşinadan eki bayraqnı çekip aldılar, olarnı yırtıp, basqaladılar. Şaatlarnıñ bildirgenine köre, qırımlı imayeciler bunı körip riayet etmediler.

OMON ve avtozaklarnen tolu bayram

Er yıl Bayraq künü Aqmescitniñ merkezinde qayd etile edi. Amma, bu sefer qırımtatarlarğa merkezde toplanmağa yasaq ettiler. Tamam iyün 26 künü Qırımnıñ «Rus cemiyeti» mında Mordoviyadan yardımnı qarşıladı.

Tantanalı tedbirler şeerniñ kenarında, qırımtatarlar toplu yaşağan Borçoqraq qasabasında ötkerildi. Ev meskenler ve qurulıp bitirilmegen evler arasındaki ot basqan meydannı qoralap, teşkerüvlerni keçirdiler. Tertipni yüzge yaqın rusiyeli politsiyasınıñ hadimleri ve bir qaç avtozaklarnen temin ettiler.

Qırımtatar gettosı amelde

Qırımtatar Bayraq kününe qırımtatarlarnıñ tahminen 3 biñi keldi. Adamlarnıñ keyfi bozıq edi, çünki olıp keçken tedbir daa çoq rezervatsiyanı añdıra edi.

Adil Ametov Türkiyeden keldi, o soylarında raatlana. Körgenleri onı şaşırttı. «Qırımtatarlarnı şeerniñ çetindeki gettoğa aydadılar. OMOn, avtozaklarnen sardılar. Halq ruhtan tüşmey, özüni qolunda tuta, amma halqqa onıñ yerini kösterdiler. Pek kederli al», – dey erkek.

Meclis azası Emine Avmileva Qırım.Aqiqatqa bergen intervyüsında qayd etkeni kibi, eñ esası – Bayraq künü ötkerildi.

«Men bellesem, bu tedbir milletmizniñ birligini numayış ete, halqnıñ kelecegi de birliknen bağlı», – dedi o.

Meclis reisi Refat Çubarov sanada çıqışta bulunır eken, qırımlı cemiyetniñ bir qısımına nisbeten ekinci dereceli adamlar kibi davranmağa mümkün degil, dedi.

«Qırımda soñki vaqıtları olayatqan vaqialarğa dair bizim mevamımız şunda ki, qırımtatar meseleleriniñ çezilüv yolları belgilenmegence soñki noqta qoyulmaycaq», – dedi Refat Çubarov.

Öz nutuğında Çubarov, Qırımğa kelmege yasaq etilgen milletniñ lideri Mustafa Cemilevni añdı. Bundan soñ, kelgenler «Mustafa!», dep qıçırıp başladılar.

Bayram tedbirleri qırımtatar yırcı ve folklor taqımlarnıñ iştiragi ile kontsertnen yekünlendi.

XS
SM
MD
LG