Link açıqlığı

Aqmescit – İşğal etilgen Qırımda tintüvler adiy bir alğa keldiler. Faqat, diniy oquv yurtunda keçirilgen tintiyuv qırımtatar cemaatçılığını çorladı. Talebe ve ocalar bulunğan mederesege belgisiz, maskalı silâlnğan şahıslar bir qaç saat devamında cinayetçiler ve silânı qıdırdılar.

Aqmescit civarındaki Bulğanaq köyünde yerleşken hafizler mektebine iyün 24 künü saba saat 6-da belgisiz, maskalı, avtomatlarnen silâlanğan şahıslar atılıp kirdiler. Şu vaqıt mektepte 13 talebe ve evi oca buluna edi. Adamlar yuqlay edi.

Şahsiyetni belgilegen veksiqalarnı ve mahkeme qararını köstermeden, arbiyler odalarnı tintip başladılar, qapu ve pencereni qırdılar. Qırım musulmanları diniy idaresiniñ vekillerine sözde ekstremizm ve silânıñ gizlenüvinde şeklenüvi sebebinden mahkeme qararına esaslanıp areket etkenlerini bildirdiler.

Müftiyatnıñ malümatına köre, tintüvni FHH-niñ (FSB) 30 vekili ve Qırım politsiyası hadimleri ötkerdiler. Amma, kelgenlerniñ kiyimlerinde işaretler yoq edi.

Medreseniniñ üyken ocasınıñ apayı Susanna Osmanova aytqanı kibi, silâlı adamlar yuqlağan talebelerni qorquzdılar. Balalarnıñ mobil telefonlarını çekip aldılar. 5 saatlıq tintüvden soñ, bir qaç bilgisayarnı alıp kettiler.

Üyken oca Ayder Osmanovnı maskalı adamlar Qırımnıñ İçki İşler Nazirliginiñ baş idaresine alıp kettiler, onı anda bir buçuq saat devamında soravdan keçirdiler. Ondan soñra, iç bir şekleyici şey tapılmağanını aytıp, yiberdiler.

Qırım Müftiyatı: bu küçniñ numayışıdır

Qırım diniy idaresinde yüz bergen vaqiağa daa qıymet kesmediler, çünki yuqarıda qayde tilgen mahkeme qararını daa körmediler.

Müftiy muavini, medrese içün mesülietli olğan Esadullah Bairov şunı ayttı: «Biz bundan eyilik körmeymiz. Bu küçniñ numayışıdır».

Resmiy olmağan malümatqa köre, islam oquv yurtunda ekstremist ve cinayetçilerni azırlaylar kibi şikâyet kelgen.

Müftiyatta añlap olamaylar: saba tañda silâlanıp, resmiy qayd etilgen oquv yurtunda ne maqsad ile bu kibi «maski-şou» keçirildi?

Medresedeki tintüvni qapu-pencerelerni qırıp ötkerdiler
Medresedeki tintüvni qapu-pencerelerni qırıp ötkerdiler

«Episi medreseler Müftiyatnıñ nezareti altında çalışalar. Er angi teşkerüvni adam aqıllı keçirmek mümkün edi. Bunı evelden de yapa ediler. Bu oquv yurtu, mında balalar tasil ala. Ve bu tintüv balalarnıñ añında büyük iz qaldıra bile. Biz bu devletniñ vatandaşları olsaq, bu devletten konstruktiv adımlarnı bekleymiz», - dep qayd etti Esadullah Bairov.

Talebelerniñ ana-babaları musulmanlarğa nisbeten bu kibi davranıştan çorlanalar

Talebeleriniñ biriniñ babası Ali Aliyev, şu sabası oğlunı ziyaret etmege keldi. Amma, bina yanında politsiya maşinasını ve silâlanğan adamlar ile tolu avtobusnı kördi. Tamam şu yerde qasevetlengen yerli sakinler buluna ediler. Erkek arbiylerden ne olıp keçkenini soramağa ıntıldı, amma cevapnı öyle de alalmadı.

Aliyevniñ aytqanına köre, arbiylerden biri, oña balanı nege ögretkenini tüşünmeli, dep ayttı.

«Men ondan soradım: «Sen İncilni oquysıñmı?» Biz de İncilni oquymız, Qurannı da oquymız. Bu Allahnıñ sözü. Mında yasaq etilgen bir şey yoq», – dedi Ali Aliyev.

Medresede oquğan talebelerniñ ana-babaları arbiylerniñ bu kibi areketlerni diniy duyğularnıñ aqaretlevi kibi qabul eteler. Olar eminler, bu kibi tintüvler Qırımda milletlerara ve dinlerara davalarğa ketire bile.

«Bizim menligimizge tiye, bizge baqıp, duşman körgenleri içün tamır halq olaraq canlarımıznı ağıra, qırımtatar olaraq canlarımıznı ağıra, ve musulmanlar olaraq canlarımıznı ağıra. Biz barışıqsever halqmız, biz er vaqıt tınç yaşadıq. Kilse yanında camiler de tura edi. Yazıq», – dedi talebeleriniñ biriniñ babası.

Qırım.Aqiqat Qırım İçki işler Nazirliginden izaat alıp olamadı.

Qırım musulmanlarına qarşı matbuat vastalarınıñ cenki başladımı?

Bulğanaq köyünde yüz bergen vaqialarğa Kiyevdeki «Umma» Ukraina musulmanları diniy idaresi endi seslendi.

Medresedeki tintüvden soñ, cam parçaları
Medresedeki tintüvden soñ, cam parçaları

«On künden ziyade matbuat vastalarında vaziyet kerginleştirilip kösterile, bir qaç maqale çıqtı, dininiy ve cemaat teşkilâtlarınıñ ve Rusiyeden «musafirlerniñ» matbuat-konferentsiyalar keçirilip, bir sıra nufuzlı musulman teşkilâtlarnı açıqtan-açıq ve gizliden müftiyatnı qabaatladılar, sanki dersiñ Qırımda Ukraina maliye etken ekstremizm inkişaf ete», – dep qayd etti «Umma» Ukraina musulmanları diniy idaresi Said İsmailov.

Bunen beraber, o Qırım musulmanlar cematçılığınıñ bazı vekillerine muracaat etip, muqaddes Ramazan arfesinde Meclis ve Müftiyatqa qarşı çalışmamağa ve musulman cemiyetini bölmemege çağırdı.

Bu künleri Qırımda resmiy ziyaret ile Poloniya musulmanlarınıñ diniy yetekçisi – müftiy Tomas Mitskeviç buluna. O şahsen Bulğanaqtaki medresege barıp, tintüvden keçken balalarnen körüşti. İyün 25 künü Poloniya müftisi Qırım «akimiyetinen» körüşip, bu vaqianı muzakere etmege niyet etti.

XS
SM
MD
LG