Link açıqlığı

Rusiye Federatsiyasında er bir devlet tiliniñ elifbesi kiril urufatına esaslanmaq kerek (Rusiye Federatsiyasınınıñ tilleri aqqında» Qanun, «Tillerniñ uquqiy vaziyeti» 3-ünci madde, 6-ncı qısım). Diger urufat federal qanunları esasında belgilene bile. Böyle etip, qırımtatar tiliniñ latin urufatına keçüv esnası yasaq etile bile.

Bunı QHA bildire.

Filologiya ilimleri doktorı, professor Adile Emirovanıñ qayd etkenine köre, latin urufatı qırımtatar tiliniñ davuş terkibini doğru bir şekilde yetkizmege ve digraflar (q, ñ, ğ,c) qullanmasından vazgeçmege imkân bere.

O, hatırlattı ki, daa 4 yıl evelsi onıñ reberligi altında Qırım müendislik-pedagogika universitetiniñ iş gruppası latincanıñ imlâ ve punktuatsiyasınıñ yañı qaidelerini azırladı.

Professor Emirovanıñ fikirince, qırımtatar tiliniñ latin urufatına keçüvini talap etmeli. Onıñ aytqanına köre, bu mesele Qırım «parlamentinde» tekrar baqılmalı.

Emirovanıñ bildirgenine köre, Rusiye tasil Nazirligine muracaat etip, qırımtatar tilinde latin urufatını istisna olaraq qullanmaq içün ruhset soramaq kerek.

20 yıldan berli qırımtatar tilini kiril urufatından latin urufatına keçirmege tırışalar. 1992 senesi qırımtatar cemaatçılığı latin urufatını qabul etti, 1997 senesi ise Qırım Yuqarı Şurası onı tasdıqladı. Lâkin bugünde-bugün yazma til yañı urufatqa tolusınen öyle de keçmedi.
XS
SM
MD
LG