Link açıqlığı

Qırımtatarlarnı «akimiyet»niñ resmiy müessiselerinde Qırımnıñ «Anayasasında» yazılğanı kibi ana tilinde laf etmege çağırlar.

Bu aqta öz Facebook saifesinde Qurultaynıñ Merkeziy saylâv komisssiyanıñ reisi Zair Smedlâyev bildirdi.

Onıñ qayd etkenine köre, Qırım Anayasasınıñ 10-ci maddesinde «Rusça, Ukrainca ve Qırımtatarca Qırım Cumhuriyetiniñ devlet tilleridir» dep aytıla.

Boşboğazlıq olmasın dep, o şahsiy tercirbeni misal olaraq ketire. Onı İyün 3-de Mustafa Cemilevnı Ermeni-bazarda qarışlamağa çıqqanı sebebinden taqiq komitetine davet etkende o olarnen ep qırımtatarca laf etken.

«Bizim aqlarımız tek kâğıt üstünde qalmasın dep, qırımtatar tili ise devlet tili olaraq Qırımda işletilmesi içün men er bir Qırımdaki akimiyet organ vekilinen laf etkende yalñız menim ana tilimde laf etecegim aqqında qarar aldım. Menim aqqımnı eda etmek içün olar terciman tapmaq kerek ediler», - dey Smedlâyev.

Şay etip o «qırımtatarlarnıñ bütün ğayretleri yoq olayatqan tuvğan tilini saqlamaq içün toplamaq kerek» fikirniñ tarafdarı: «Bügün ise tilini yahşı bilgen yüzlernen yaş mütehassıslar işsiz qalalar. Eger biz er yerde ana tilimizde laf etmekni talap etsek, arizalar, beyannameler ve başqa vesiqalarnı qırımtatarca yazsaq, ve resmiy müessiselerde bizlernen qırımtatarca laf etmesini talap etsek «akimiyet» devlet organlarğa qırımtatar tili mütehassıslarnı davet etmege mecbur olacaq».
XS
SM
MD
LG