Link açıqlığı

Qırımda mühbirlerge yapılğan basqı adiselerine Birleşken Mustaqil Devletlerniñ uquq qorçalayıcıları qıymet keseceklermi?


Aqmescit – İşğal etilgen Qırımda mühbirlerniñ faaliyetine keder etip, basqı yapılması devam etile. Böyleliknen, Aqmescitte «imaye» vekilleri «Mühbirler taqiqatı merkezi»niñ eki hadmini yaqalap, köteklediler. «Avdet» qırımtatar gazetasınıñ muarririni ekstremizmde şeklep, prokuraturağa çağırttılar. Qırımda, artıq mühbirlir teşkilâtları qalmadı, Ukraina jurnalistleri Milliy birligi künlerde resmiy olaraq Rusiye birligine çevirildi. Qırım mühbirleri öz aqlarını nasıl qorçalay bileler?

Bazar ertesi, iyün 2 künü Aqmescitte «imaye» vekilleri «Mühbirler taqiqatı Merkeziniñ» eki hadimi Sergey Mokruşin ve Vladlen Melnikovnı yaqaladılar. Yaqalanğanlarnı «imaye» ştabına ketirip, köteklediler. Mühbirler bir qaç saat devamında politsiyanı çağırtmağa talap ettiler.

«Politsiya bizim areketlerimizde cinayetlik çizgilerni qayd etmeyip, memuriy protokolnı tizmedi. Aynı zamanda men, qırımlı «imaye» tarafından qanunsız areketleri boyunca ariza yazdım. Ümüt etem ki, qırımlılar, bu insanlar kim olğanı, nege esaslanıp faaliyet etkenleri sualine cevap alırlar. Bu qanunsızlıqtır», – dep qayd etti zararlanğan mühbir.


Ekimler mühbirlerniñ bedenlerinde kelepçe ve köteklenüv izlerini qayd ettiler. «Qırım Cumhuriyeti boyunca içki işler nazirligi» matbuat hızmetiniñ vekili Оlga Bogoslovskaya bildirgeni kibi, bu adise boyunca teşkerüvler ötkerile.

«Aqmescitniñ politsiyasına qırımlı «imaye» vekilleriniñ qanunsız areketleri aqqında ariza berildi. Şimdiki vaqıtta teşkerüvler ötkerile, neticede, üküm etken qanunlar esasında qarar çıqarılacaq. Er tarafnıñ areketlerine qıymet kesilecek», - dep qayd etti «Qırım politsiyasınıñ» vekili.

Qırımnıñ işğalinen razı olmağanlar ekstremistler kibi sayıla bileler


Aynı zamanda «Avdet» qırımtatar gazetasını ekstremizmde şekleyler. Neşirniñ baş muarriri Şevket Kaybullayevni prokuraturağa soravğa çağırttılar. Celpnameniñ metininde, Aqmescitniñ «prokuraturası», gazeta yolbaşçıları, Rusiye Federatsiyasınıñ «Ekstremist faaliyetine qarşı» qanunnıñ bozuvı boyunca teşkerüvler keçire.

«Olar endi evelden bizim faaliyetimizni ekstremist olaraq belgilediler. Olarnıñ fikirince, bu qabaatlavlar maqalelerimizde qullanılğan «vaqtınca işğal etilgen topraq», «Qırım işğali» kibi cümlelernen bağlı», - añlattı Şevket Kaybullayev.

«Avdet» gazetası qırımtatar halqı Meclisiniñ matbaa organı olaraq 1990 senesi, iyül 15 kününden başlap derc etile.


Qırımlı mühbirlerni mahsus missiya qoruycaq

Qırımda Ukraina mühbirleri Milliy birligi artıq çalışmay. Mayıs 31 künü bu teşkilât öz faaliyetini toqtattı, onıñ yerine resmiy olaraq Rusiye mühbirleri birligini teşkil ettiler. Bunı akimitke baqqan «Krıminform» informatsion qaynağı bildirdi.

Qırımdaki vaziyetke ukrain uquq qorçalayıcılarnıñ da tesir etmge çareleri yoq, çünki öz başına ilân etilgen Qırım «akimiyeti» ve «imaye» ile qanun boyunca bağlanıp olamaylar.

Keçenlerde Qırımda insan aqları boyunca mahsus missiya teşkil etildi. Teşkilâtnıñ esas maqsadı, işğal etilgen yarımadada sakinlerniñ aq ve uquqlarnı qorçalamaqtır. Missiya terkibine Birleşken Mustaqil Devletlerniñ uquq-qorçalayıcı teşkilâtlarnıñ vekilleri kirdi. Teşkilâtnıñ işini, Rusiye prezidenti yanında insan aqları ve grajdan cemiyetiniñ inkişafı boyunca Şurasınıñ azası Andrey Yurov idare ete.

Teşkilâtnıñ Qırımdaki koordinatorı Andrey Krısko Radіo Svoboda-ğa bildirgeni kibi, mühbirlerge yapılğan soñki basqı adiseleri endi teşkilâtnıñ nezareti altında bulunlar. Şimdiki vaqıtta, Birleşken Mustaqil Devletlerniñ uquq qorçalayıcılarına muracaat azırlana. Onda, mevcut olğan qanunlar esasında soñki vaqialarğa qıymet kesmege rica etile. Krısko bildirgenine köre, bu vaqialar aqqında ombudsmen Ella Pamfilova da haberdar etildi.

Radіo Svoboda
XS
SM
MD
LG