Link açıqlığı

Meşur alimlerni Rusiye tarafından işğal etilgen Qırımda qırımtatar halqınıñ al-vaziyeti raatsızlay.

AQŞ, Kanada, Avropa memleketleri, Turkiye, Avstraliya, Yaponiya, Qazahistan, İsrail, em de Ukraina mütehassısları al-azırda aqları zulum etilgen qırımtatarlarğa qol tutqanlarını bildirdiler.

Olar umumiy beyanat tizip, imzalar toplap başladılar. Vesiqağa binaen, alimler «yarımadada qırımtatarlarnıñ aq-uquqlarını bozuv içün mesüliyetni Rusiye işğalci organlarına» yüklediler.

İşbu beyanatnıñ teşebbüsçileri dört alim oldı – George Mason Universitetinden Idil P. Izmirli (AQŞ), Viktor Ostapçuk – Toronto Universiteti (Kanada), András Riedlmayer – Harvard universiteti (AQŞ) ve Maria Sonevytsky – Bard College (AQŞ).

Böyleliknen, alimler Qırım hanlığı, Osmanlı devleti ve Sovetler Birligi devrinde qırımtatarlarğa qarşı yapılğan repressiyalar aqqında hatırlatıp, Rusiyeniñ Qırım işğalini takbih ettiler.

«1991 senesi Sovetler Birligi dağıtılğan ve mustaqil Ukraina ilân etilgen soñ, sürgünlikke oğrağan qırımtatarlarnıñ çoqusı balalarınen beraber qıyınlıqlar ve manialardan keçip, vatanğa qaytıp keldi. Bugünde-bugün Qırımda olarnıñ sayısı 300 000 adamnı teşkil ete. Aynı bu sebepten Sankt-Peterburg ve Moskva akimiyeti altında bulunıp, büyük milliy yarağa çevirilgen bir çoq facialarnı yaşağan qırımtatarlar Ukrainanen yahşı munasebette bulunalar ve Rusiyeniñ Qırım işğalini qatiyen tanımaylar», – dep aytıla beyanatta.

Alimler qayd etkenlerine köre, qırımtatar halqı Rusiye vatandaşlığından vazgeçken qırımtatarlar yañı repressiyalar ve sürgünlikke oğratılacaq, dep qorqa.

Alimler 1944 senesi sürgünlik faciasınıñ qurbanları aqqında matem mitingini keçirmek yasağını da takbih ettiler.

«Bizler er bir devlet, teşkilât ve adamnı bizge qoşulıp, qırımtatarlarnıñ milliy ve insan aq-uquqlarına, şu cümleden medeniy, içtimaiy, siyasiy ve iqtisadiy aqqlarına qol tutıp, işbu aqlarnı bozuv içün mesüliyetni Rusiyeniñ işğalci organlarına yüklemege çağıramız», – dep aytıla beyanatta. Vesiqanı bütün dünyadan 220-den ziyade alim imzaladı.

Beyanatnen scholarsforqirim.com saytında tanış olmaq mümkün.
XS
SM
MD
LG