Qırımlı qaçaqlarnıñ, mecburen köçkenlerniñ ya da adliye tilinen aytılacaq olsa, devletniñ içinde mekânlarnı avuştırğan adamlarnıñ içtimaiy ağlarda bağ qurmaq ve birleşmek areketleri tuvğan evlerini qaldırmazdan evel başlandı.
Facebook «Krim_SOS» gruppası keçenlere faaliyetiniñ 3 aylığını qayd etti. Gruppa fevral 27 künü 2014 senesi teşkil etilip, 49 084 qullanıcınıñ alğışını qazandı, 17 176 adam onı muzakere ete ya da qayd etti. Leyha teşebbüsçileri Tamila Taşeva, Sevgil Musayeva ve Alim Aliyevdir.
Teşebbüsçiler haberlerni yerleştirip, medeniy leyhalarnen oğraşıp, zarar körgenlerge yardım köstereler – em maddiy, em de maneviy cietinden destekleyler. Bu vaqıt içinde Facebook, Twitter, Vkontakte-de saifeler açılıp, 120 göñülli tarafından toldurılıp kelmekte.
2014 senesi martnıñ ortasına qadar «Krim_SOS» ukrain askerlerine faal yardım etti, arbiy qısımlarğa yemek ve donatmalarnı yolladı. Teşkilât azaları Qırımdaki vaziyetniñ talilini keçirdiler, devlet akimiyet organlarına tevsiyeler berdiler, qaçaqlar meselelerinen oğraşqan halqara teşkilâtlarnen bağ qurdılar, ve ondan ziyade tedbir keçirildi. «Krim_SOS» teşebbüsçileri «Ukrainanıñ vaqtınca işğal etilgen territoriyasında vatandaşlarnıñ aq ve serbestlikniñ teminlevi aqqında» qanunnıñ işlep çıqarılmasında iştirak ettiler.
Teşebbüsçiler Qırımda elâk olğan qırımtatarı Reşat Ametovnıñ qorantası içün para topladılar. Onı «imaye» vekilleri yaqalağan ediler, bundan soñra, onı ölü taptılar. «Krim_SOS» çoq balalı qorantağa 30000 grivna miqdarında para yardımı ve balalar, ana içün 10 000 grivnağa alınğan urba alıp yiberdiler.
Umumen, soñki 1,5 ay devamında «Krim_SOS» göñüllileri 67 000 grivnanı toplap, 200 den ziyade qaçaqqa yardım kösterdiler. Yardım olaraq mahsulatlar, urba, donatmalar alına. Em de yarımadanı terk etken 600 qırımlığa yerleşmege yardım etti.
Tamila Taşevanıñ sözlerine binaen, qaçaqlarnı ekseriyetnen şahsiy dairelerde yerleştireler. Bundan ğayrı, Kiyev sakinleri ve diger ukrain şeerlerniñ mecburen köçkenlerge gumanitar yardımnı köstereler. Misal içün, mayıs 28 künü qaçaqlarnıñ ihtiyacları aqqında bildirme yerleştirildi, onı 139 qullanıcı tarqattı:
Tamila Taşeva bildirgeni kibi, mayıs 28 künü 2014 senesi Dımerka ve Letkada qaçaqlarğa 4480 grn sarf etildi. Teşebbüsçiniñ saifesinde Maria Burmaka tarafından qaldırılğan medeniyet ile bağlı qaydlar bar:
«Evromaydan SOS» cemaat teşebbüsiniñ daa bir leyhasını 100 biñden ziyade qullanıcınıñ alğışını qazanıp, tek Qırımdan degil de, Rusiye istilâsından sebep, Ukrainanı diger regionlarından köçip kelgenlerge destek köstereler. Bir çoq bildirmeler büyük diqqatqa lâyıq, misal içün zarar körgen regionlardan kelgen abituriyentlerge haber berile:
Kiyevdeki Qırım Cemiyetiniñ saifesi bir ay evelsi peyda oldı, onı endi 854 qullanıcı begendi. Saifede cemiyetniñ faaliyetini aydınlatqan çeşit bildirme ve Qırım haberleri neşir etile.
«Qırım qaçaqları» saifesinde 529 qullanıcı bar, «gruppa, Qırımdan kelgen qaçaqlarnı ve bu meselege lâqayd olmağan»larnı birleştire.
«Mecburen köçip kelgenlerge yardım etken koordinatsion merkezi» parasız çalışqan teşkilât Facebookta mayıs 19 künü peyda oldı. Saifeleriniñ birinde bank varaqası ile mecburen köçip kelgenlerge para yollamaq mümkün. Diger leyhalar kibi, bu teşkilât qırımlı qaçaqlarğa yerleşmege yardım ete.
