Link açıqlığı

Saatnıñ esas haberi

Rey berüv şartları qolaylaştırılğan olsa edi, Qırım saylaycılarnıñ sayısı daa çoq olur edi


Nacіe Femі

Aqmescit – Para ve vaqıtnıñ qıtlığı, hafsızlıq temin etilmegeni sebeplerinden Ukraina prezidenti saylavlarında iştirak etken qırımlı ukrain vatandaşlarınıñ sayısı azca oldı. Çünki, reyni bermek içün qırımlılar yarımadadan qıtaiy qısımğa eki kere – birinciden, qayd etilmek, soñra saylavlarda iştirak etmek maqsadınen barmaq mecbur oldılar.


Ukraina prezidenti saylavlarında iştirak etmek içün Qırım skinleri saba saat 8-de yolğa çıqtılar. Ekseriyetnen Herson vilâyetinde rey berdiler. Şu vilâyetniñ Novoalekseyevka qasabasında bulunğan jurnalist Miroslava Kanarskaya bildirgeni kibi, yerli akimiyet Qırım saylaycılarnı qarşılamağa azır edi.

«Yerli akimiyet, Herson vilâyeti regional meclisniñ azaları ile saylaycılarnı sıñırda bayraqlarnen qarşılap, gimn icra ettiler. Bundan soñra, teşkil etilgen kolonnalar ile saylav bölüklerine alıp kettiler. Adamlar nevbetsiz ve problemsiz rey bere bildiler. Saylaycılar beklemezden rey bermeleri maqsadında, olar içün ayırı masa ve cedveller azırlandı», – dep bildirdi jurnalist Miroslava Kanarskaya.


Qırımtatarlar Mecliske bağlanmay, özleri seçim yapa bildiler


Meclis vekili Teyfuk Gafarovnıñ bildirgenine köre, iştirakçilerniñ hafsızlığını kefil etip olamağanı sebebinden, qırımtatar halqı Meclisi adamlarnıñ areketlerinde iştirak etmedi. Saylaycalar, 200 kilometr mesafeni öz küçüne tayanıp, avtobus, tren, kendi avtomobillerin minip keçe bildiler.

Bu yoldan keçkenler arasında 76 yaşında Dilâra Bariyeva da buluna edi:

«Men mında mahsus keldim, Ukraina ve kendi halqım içün rey berdir. Qırım – ecdtlarımıznıñ toprağıdır».


Qırım saylaycılarnıñ sayısı daa çoq ola bilir edi

Ukraina saylaycıları Qırım komiteti yolbaşçısı Andrey Kriskonıñ fikirince, saylavlarda iştirak etmek içün yarımadanı eki kere – birinciden, qayd etilmek, soñra rey bermek içün terk etmek meselesi saylaycılarnıñ sayısına bayağı tesir etti. Çünki para ve vaqıtnıñ sarf etilmesini talap ete. Kriskonıñ fikirini Meclis azası Eskender Bariyev tasdiqlay. O da, saylavlarda iştirak etti.

«Evelden qayd etilgen adamlar rey berip oldılar. Qayd etilmegenler de isteklerini kösterdiler. Bu mesele qolaylaştırılğan olsa edi, eminim, Kırımdan biñlerce insanlar iştirak eter ediler», – dep qayd etti Meclis azası Eskender Bariyev.

Merkeziy saylav komissiyasınıñ malümatına köre, saylavlarğa qatnaşqan qırımlı vatandaşlarnıñ sayısı 6 biñni teşkil etti.
XS
SM
MD
LG